Кредитнинг мақсадсиз ишлатилиши эҳтимоли катта бўлгани учун фуқарога кредит ажратилмади
Телеграм каналларидан бирида Қашқадарё вилоятининг Деҳқонобод туманида яшовчи Меҳринисо Сайфиеванинг видеомурожаати эълон қилинди.
Унда фуқаро Халқ банкининг Деҳқонобод филиалидан чорвачилик билан шуғулланиш учун имтиёзли кредит олмоқчилигини, аммо уч ойдан буён маблағ ажратилмаётганини баён қилган.
Ушбу видеомурожаат бўйича ўрганиш олиб борилганда қуйидагилар аниқланди.
Ҳақиқатдан ҳам М.Сайфиева Халқ банкининг Деҳқонобод филиалига чорвачилик билан шуғулланиш учун имтиёзли кредит олиш мақсадида мурожаат қилган. Аммо орадан кўп ўтмай кредит олиш ниятидан қайтганлигини билдирган. Қизиғи, икки ой муддат ўтгач, яна банкка келиб, кредит олмоқчилигини айтган.
Банк ходимлари фуқаронинг чорва боқиш шароити ва таъминотчи етказиб берган чорвани мониторинг қилиш учун борганида, М.Сайфиеванинг яшаш жойида қўй боқиш учун имконият йўқлиги аниқланган. Шунингдек, таъминотчидан олинган қўйлар мониторингларда бошқа-бошқа эканлиги маълум бўлди.
Ана шу омилларни инобатга олган ҳолда ҳамда кредитнинг мақсадсиз ишлатилиши эҳтимоли катта бўлганлиги сабабли М.Сайфиевага кредит ажратилмаган.
Эслатиб ўтамиз, аввалроқ сохта хайрия акцияси уюштириб, 11 миллион сўмни ўзлаштирган йигит қўлга олингани ҳамда банкларга берилган кредитлар муддатини чеклаш амалиёти бекор қилиниши ҳақида хабар берилганди.
Баҳринисо Мадумарова тайёрлади.
