Ўзбекистонда сайловларни ўтказиш амалиёти сифат жиҳатидан янги босқичга кўтарилди
Шавкат Мирзиёев Мустақилликнинг 30 йиллиги байрами тадбирида бўлажак президентлик сайловига доир муҳим фикрлар билдирди.
“Олдимизда муҳим сиёсий воқеа турибди. Шу йил 24 октябрь куни мамлакатимизда Ўзбекистон Республикаси Президенти сайлови бўлиб ўтади.
Сўнгги беш йил мобайнида мамлакатимиз миллий сайлов қонунчилигида жиддий ўзгаришлар юз берди. Нуфузли халқаро экспертлар таъкидлаганидек, янги Ўзбекистонда сайлов қонунчилигини изчил такомиллаштириш ҳамда сайловларни ўтказиш амалиёти сифат жиҳатидан янги поғонага кўтарилди. Сайловда дунёнинг 50 га яқин мамлакати ҳамда ўнлаб халқаро ташкилотлардан кузатувчилар иштирок этиши кутилмоқда”, - деб қайд этган Давлатимиз раҳбари.
Сайловларда мамлакатда рўйхатга олинган бешта партиядан беш номзод: Экологик партиядан – Нарзулло Обломуродов, «Адолат» партиясидан – Баҳром Абдуҳалимов, «Миллий тикланиш» партиясидан – Алишер Қодиров, Халқ демократик партиясидан – Мақсуда Варисова, ЎзЛиДеП партиясидан – Шавкат Мирзиёев иштирок этади.
Айни пайтда Ўзбекистон Республикаси Президенти сайловига тайёргарлик кўриш бўйича асосий тадбирлар дастурига мувофиқ 814 нафар ОАВ вакиллари аккредитациядан ўтказилган бўлиб уларнинг 766 нафари маҳаллий ва 48 нафари хорижий ОАВ вакиллари ҳисобланади.
Эслатиб ўтамиз, аввалроқ 2021 йил 24 октябрь санасида Ўзбекистон Президенти сайлови бўлиб ўтиши ҳақида хабар берилган эди.
