Бугундан яна бир янги нодавлат телетармоқ иш бошлади

 

 

Ўзбекистон электрон оммавий ахборот воситалари миллий ассоциацияси (ЎзЭОАВМА) муассислигидаги Renessаns TV телетармоғи  жорий йилнинг апрель ойида ЎзЭОАВМА ташаббуси билан бир қатор вазирлик ва идоралар ҳамкорлигида ишлаб чиқилган “Янги Ўзбекистон. Янги нигоҳ” медиа дастури доирасида ташкил этилди. 

 

 

Renessаns TV телетармоғи бугун, 1 сентябрдан тест режимида ўз эфирини бошлади. Ҳозирча республикамизнинг 70% ҳудудини қамраб олиши кўзда тутилган мазкур телетармоқ кейинчалик босичма-босқич бутун юртимиз бўйлаб ўз медиамаҳсулотларини тақдим этади.

 

— Айни пайтда ассоциациямизга аъзо бўлган 48 телерадиоканалнинг 13 тасини ҳудудлардаги 13 та нодавлат телеканаллар ташкил этади, — дейди ассоциация директори ўринбосари Рустам Жабборов. — Уларнинг ҳар бири ўз аудиторияси, ўз тарқалиш ҳудудига эга бўлгани сабабли бир-бири билан рақобатлашмайди. Renessаns TVнинг асосий мақсади ушбу телеканалларни ягона телевизон тармоққа бирлаштириш, ҳар томонлама қўллаб-қувватлашдан иборат. Ўз навбатида, жойлардаги жараёнларни, воқеа-ҳодисаларни мунтазам ёритишда ҳудудий нодавлат телеканаллар ҳам бизга яқиндан ёрдам беради.

 

Ҳудудий нодавлат телеканалларнинг аксарияти сифатли, лицензияланган медиа-маҳсулотларни сотиб олиш имкониятига эга эмас. Renessаns TV эса, Ўзбекистон кинематография агентлиги, хусусий киностудиялар, тегишли ташкилотлар билан шартнома асосида турли медиа-маҳсулотлар, фильмлар ва сериалларни мазкур телевизион тармоқ орқали томошабинларга тақдим этилади. Шунингдек, жамиятимиздаги долзарб масалаларнинг етакчи экспертлар, тегишли мутасаддилар, таниқли журналист ва блогерлар иштирокидаги муҳокамасига бағишланган турли форматдаги кўрсатувлар эфирга узатилади.

 

 

Телетармоқнинг ижодий ва техник гуруҳлари шакллантирилди. Тест режимида телетармоқ ходимлари ўзбек киносининг нодир дурдоналари ҳамда сўнгги йилларда яратилган бадиий ва ҳужжатли фильмлар, мумтоз ва замонавий куй-қўшиқлар, таниқли санъаткорларнинг концерт дастурларини томошабинлар эътиборига ҳавола этилмоқда.

 

 

Renessаns TV телетармоғи Ўзбекистон Республикаси мустақиллигининг 30 йиллигига тўёна сифатида телетомошабинлар учун муносиб туҳфа бўлди.

 

 

Баҳринисо Мадумарова