Германия Ўзбекистонга коронавирусга қарши юқори самарага эга 10 минг доза дори воситасини юборади
Германия Ўзбекистонга инсонпарварлик ёрдами тариқасида 10 минг доза Casirivimab/Imdevimab комбинацияланган препаратини юборади. Бу препарат коронавирус инфекциясига қарши курашда юқори самарага эга, деб хабар беради Соғлиқни сақлаш вазирлиги матбуот хизмати.
Маълум қилинишича, Тошкентга 2 сентябрь куни соат 21:00 да келадиган юкнинг умумий қиймати 20,6 миллион еврони ташкил қилади.
Casirivimab/Imdevimab (Швейцариянинг Roche фармацевтика компаниясидан) — COVID-19’га қаршиликни ишлаб чиқариш учун мўлжалланган сунъий «антитаначалар коктейли». Ҳозирги вақтда препарат уларнинг ҳали ҳам янги штаммларга чидамли ягона комбинацияси ҳисобланади.
Тадқиқот натижаларига кўра, препарат касалхонага ётқизиш ва коронавирусдан ўлиш даражасини 70 фоизга камайтирди, шунингдек, касаллик аломатларининг давомийлигини 14 кундан 10 кунгача қисқартирди.
Аввалроқ Ўзбекистон вакцина захираси бўйича МДҲ мамлакатлари орасида етакчи бўлгани ҳақида хабар берилганди.
