Шавкат Мирзиёев Ислом Каримов ҳайкали пойига гул қўйди
Президент Шавкат Мирзиёевнинг қарорига мувофиқ, Ислом Каримов вафот этган 2 сентябрь санаси Хотира куни сифатида белгиланган. Бу кунда жамоатчилик йиғилиб, биринчи президентимизни ёд этиш эзгу анъанага айланган, дея хабар бермоқда президент матбуот хизмати.
Давлат раҳбари ва ҳукумат аъзолари Ислом Каримов номидаги ёдгорлик мажмуасида биринчи президент хотирасига ҳурмат кўрсатди.
“Давлатимиз раҳбари бугун Ислом Каримов номидаги илмий-маърифий ёдгорлик мажмуасига ташриф буюрди. Биринчи Президентимиз ҳайкали пойига гулчамбар қўйиб, унинг хотирасига ҳурмат бажо келтирди.
Қуръон тиловат қилинди.
Ўтганларни яхшиликлари билан эслаш – эзгу фазилат. Аждодлар ҳурматини жойига қўйган инсоннинг ўзи ҳам ҳурматга лойиқ.
Шавкат Мирзиёев истиқлолимизнинг 30 йиллик байрамига бағишланган тантанали маросимда Ислом Каримов Ўзбекистон мустақиллигини эълон қилиб, тарихимизнинг энг мураккаб ва оғир даврларида давлатимизни бошқарганини таъкидлади.
Ушбу хотира тадбири ҳам халқимизнинг Биринчи Президентга ҳурмати ифодасидир.
Маросимда Ўзбекистон Республикаси Олий Мажлиси Сенати ва Қонунчилик палатаси, Президент Администрацияси, Вазирлар Маҳкамаси, вазирлик ва идоралар, пойтахт жамоатчилиги вакиллари ҳам иштирок этди.
Ислом Каримовнинг Самарқанд ва Қарши шаҳарларидаги ҳайкаллари пойига ҳам гуллар қўйилди”, – дейилади хабарда.
