Гурбангули Бердимуҳаммедов Ўзбекистонга келади
Туркманистон Президенти яқин орада Ўзбекистонга ташриф буюради. Бу ҳақда “Anadolu” агентлиги хабар берди.
Гурбангули Бердимуҳаммедов яқин вақт ичида Ўзбекистонга расмий ташриф билан келади. Бердимуҳаммедов бу ҳақда видеоселекторда айтиб ўтган.
Туркманистон раҳбари бош вазир ўринбосари Эсенмырат Оразгелдиевга кейинги ҳафтада ўтказиладиган савдо-иқтисодий, илмий-техникавий ва маданий ҳамкорлик бўйича қўшма ўзбек-туркман комиссияси йиғилиши доирасида Ўзбекистон томони билан имзоланиши кутилаётган битимларни муҳокама қилишга топшириқ берган.
“Бугун дўстлик, биродарлик, яхши қўшничилик тамойилларига асосланган ўзаро ҳамкорлик интенсивлиги билан ажралиб туради. Юқори даражада ўтган учрашув ва музокараларда эришилган келишувлар ҳамда истиқболда белгиланган режалар ўзбек-туркман муносабатларини ўзаро манфаатларга жавоб берадиган янги босқичга олиб чиқади”, – деган Бердимуҳаммедов.
Маълумот ўрнида: Туркманистон Президенти сўнгги марта 2019 йил ноябрида Ўзбекистонга ташриф буюрганди.
Ўзбекистон Республикаси Президенти Шавкат Мирзиёев 2021 йил августида Туркманистоннинг “Аваза” туристик мажмуасида ўтказилган Марказий Осиё президентлари маслаҳат учрашувида иштирок этган эди.
Жаҳонгир Қўзиев
