Тўйхонада келин-куёв томонлар ўртасида катта жанжал бўлди
Тўй икки ёшнинг ҳаётида туб бурилиш ясовчи, янги ҳаёт сари қўйиладиган илк қадам. Ҳар бир инсон бу кунни ҳаётининг энг бахтли дамлари сифатида тарих зарварақларига муҳрлайди.
Ширин хаёллар оғушида юрган келин-куёв тўй кунида умуман режа қилинмаган ишларга гувоҳ бўлса, қандай ҳолатга тушади? Айниқса, у бўлажак қариндош-уруғлар ўртасидаги жанжал бўлса...
Сурхондарёлик жуфтликлар ҳам кўпдан бери интиқлик билан кутилган кун бундай якун топиши ҳақида ўйламаганди. Aфсуски, ҳамма иш режалардагидек ҳал бўлавермайди.
Жорий йилнинг 1 сентябрь куни Сурхондарё вилояти Музработ туманидаги тўйхонада келин томон ва куёв томон вакилари ўртасида низо келиб чиққан. Бу ҳақда вилоят Ички ишлар бошқармаси ахборот хизмати хабар қилди.
Маълум бўлишича, туманннг “Дўстлик” маҳалласидаги “Орғул” тўйхонасида шу куни соат 13:30 атрофида Р.И., Қ.Ў., А.А. ва бошқалар бир гуруҳ бўлиб, фуқаро Д.А.ни ҳеч бир сабабсиз уриб, тан жароҳати етказган. Oқибатда, фуқаро Д.А. туман тиббиёт бирлашмаси шошилинч тез тиббий ёрдам бўлимига ётқизилган. Суд-тиббий экспертизаси хулосасига кўра, Д.А. ва А.А. олган тан жароҳатлари енгил деб баҳоланган.
Тергов бўлими фуқаро Д.А.га нисбатан Жиноят кодексининг 277-моддаси (Безорилик) 1-қисми билан, Р.И., Қ.Ў., А.А.га нисбатан шу модданинг 2-қисми “б” банди билан жиноят иши қўзғатган. Ҳозирда терговга қадар текширув ҳаракатлари олиб борилмоқда.
Aввалроқ, Мўйноқда содир бўлган оммавий муштлашув ҳақида хабар берган эдик.
