“Дональд Трампнинг навбатдаги президентлик сайловида қатнашишига ишончи комил” — Жейсон Миллер
Американинг собиқ етакчиси республикачи Дональд Трамп 2024 йилда бўладиган навбатдаги президентлик пойгасида иштирок этади ва буни эълон қилиш учун қулай вақтни кутмоқда. Бу ҳақда “Politico” газетаси Трампга яқин манбалар, шунингдек, АҚШ Республикачилар партияси аъзолари маълумотларига таяниб хабар тарқатган.
Газетада ёзилишича, собиқ президент оммавий ахборот воситаларида ўз иштирокини сезиларли даражада оширди ва унинг штаб-квартираси маблағ йиғишни кучайтирди. Бундан ташқари демократларнинг амалдаги Президенти Жо Байденга қарши ҳужум ва сиёсий рекламалар ҳажми янада кўпайди.
Нашр манбаларига кўра, коронавирус тарқалиши билан боғлиқ вазиятнинг ёмонлашиши ҳамда Афғонистонда содир бўлган воқеалар фонида Байден рейтингининг пасайиши Трампнинг сайловда қатнашишга бўлган қизиқишини кучайтирди.
Трампнинг собиқ маслаҳатчиси ва матбуот котиби Жейсон Миллер собиқ президентнинг сайловларда қатнашишига ишончи комил эканини билдирди.
Насиба Тўхтаева
