Афғонистонни тиклаш учун асосий ёрдамни АҚШ бериши керак — Россия ТИВ
Россия ТИВ расмий вакили Мария Захарова Афғонистонга, энг аввало, АҚШ ёрдам бериши шартлигини айтди. Бу ҳақда “Спутник Афганистан” маълум қилган.
“Афғонистондаги мавжуд вазиятга, энг аввало, 20 йил давомида мамлакатда бўлган АҚШ ва халқаро коалиция аъзолари жавобгар, деб ҳисоблаймиз. Шу боис Афғонистонни тиклаш учун кетадиган харажатларнинг катта қисмини айнан улар қоплаши керак”, — деган Захарова.
Ҳозирда АҚШ собиқ Афғонистон ҳукуматига тегишли 9 миллиард доллардан ортиқ маблағни музлатиб қўйган. Жаҳоннинг бир неча давлатлари, хусусан, РФ, Хитой ва Покистон Вашингтондан бу пулларни қайтаришни сўраган. Шунингдек, Афғонистонлик бизнесменлар ҳам АҚШга шу мазмунда мурожаат билан чиққан. Уларнинг сўзларига кўра, заҳираларнинг 3 миллиарди хусусий секторга тегишли. “Толибон” вакиллари музлатилган маблағлар мамлакат тикланиши учун зарурлигини таъкидлаб келмоқда.
АҚШ бундай катта заҳирани толиблар ҳарбий мақсадларда ишлатишидан хавотирда. Шунинг учун ҳозирча пуллар қайтарилмаган.
Маълумот ўрнида: 15 август куни “Толибон” ҳаракати Кобулни эгаллаган. 31 августда АҚШ Афғонистонни тўлиқ тарк этди. Ҳаракат эгалламаган ягона вилоят Панжшер эди. Аммо 6 сентябрда ушбу ҳудуд ҳам “Толибон” назоратига ўтди. Шундан кейин толиблар 7 сентябрь куни мамлакатнинг янги ҳукумати тузилганини эълон қилди.
Эслатиб ўтамиз, бундан аввал “Толибон” раҳбарияти ўртасида низо йўқлиги хабар қилинган эди.
Жаҳонгир Қўзиев
