Толиблар вакили Анас Ҳаққоний Афғонистон бош вазири биринчи ўринбосари Мулла Бародар ва миграция масалалари бўйича вазир Ҳалил Раҳмон Ҳаққоний ўртасида низо чиққанини рад этди. Унинг сўзларига кўра, “Бу хабар ҳақиқатга тўғри келмайди ва ‘Толибон’ душманлари тарқатаётган иғводан бошқа нарса эмас”.
Анас Ҳаққоний Афғонистон ички ишлар вазири Сирожиддин Ҳаққонийнинг акаси ва толиблар сиёсий офиси аъзоси ҳисобланади. У ҳаракатнинг араб дунёси ва мусулмон мамлакатлари билан алоқаси учун жавобгар. Баъзи манбалар “Ҳаққоний тизими”ни Покистон разведкаси билан алоқадорликда айблаб келади.
Бундан аввал Мулла Бародар ва “Ҳаққоний тизими” ўртасида низо чиққани хабар қилинганди. Бунга Абдулғани Бародарнинг ҳукумат тузилмасидан норозилиги сабаб бўлган. Унинг Кобулни тарк этиб, Қандаҳорга кетгани маълум қилинган. 16 сентябрь куни ижтимоий тармоқларда Мулла Бародарнинг Қандаҳордаги тасвирлари тарқалди. Бародар у билан ҳаммаси жойидалиги, ҳаракат раҳбарлари ўртасида низо мавжуд эмаслигини айтган.
Бундан аввал Сирожиддин Ҳаққонийнинг БМТ вакиллари билан учрашгани маълум қилинган эди.
Маълумот ўрнида: 15 август куни “Толибон” ҳаракати Кобулни эгаллаган. 31 августда АҚШ Афғонистонни тўлиқ тарк этди. Ҳаракат томонидан эгалланмаган ягона вилоят Панжшер эди. Аммо 6 сентябрда ушбу ҳудуд ҳам “Толибон” назоратига ўтди. Шундан кейин толиблар 7 сентябрь куни мамлакатнинг янги ҳукумати тузилганини эълон қилди.
Жаҳонгир Қўзиев