Алишер Қодиров талабалар ундан ёрдам сўрашаётганини айтди
Ўзбекистон Республикаси Президентлигига “Миллий Тикланиш” ДПдан номзод Алишер Қодиров талабалар ундан ёрдам сўрашаётганини айтмоқда. Бу ҳақда у ўзининг ижтимоий тармоқдаги саҳифасида ёзиб қолдирган.
Диплом - мутахассиснинг сифат белгиси бўлиши керак, кўзбўямачилик қуроли эмас!
Кўп ёшлар қўшни давлатларнинг олийгоҳларидан ўқишларини Ўзбекистон олийгоҳларига кўчириш учун қийин талаблар бўлаётганидан норози бўлиб, бу масалада ёрдам беришимни сўрамоқдалар.
Ёрдам бера олмайман, чунки ўрнингизга имтиҳон топшира олмайман.
Ўзбекистон олийгоҳларига ўқишни кўчириш учун топшириладиган тестда минимум 67 балл тўплаш талаб қилинмоқда. Бу жуда паст балл.
Қолаверса, қўшни давлатлардаги «олийгоҳларга» нима мақсадда ўқишга кирилаётганини ҳаммамиз ҳам яхши биламиз.
Шу билан бирга, ўқишга интилаётган ёшларни шу каби «ўйинлар»га мажбурлаётган саралаш тизимини ҳам ўзгартириш ҳақида ўйлаш вақти келди.
Албатта, одамларда шаклланиб қолган: “олий маълумот дипломи - кафолатланган фаровонлик” деган қарашни ҳам ўзгартириш керак. Мактаб шаҳодатномаси билан, ақл ва мантиқни ишлатган тадбиркор иккита диплом билан 8 дан 22 гача, бошини эгиб 5 миллион сўм маош олаётган давлат хизматчисидан бир неча баробар кўп даромад топяпти ва яхшироқ яшаяпти.
Менимча, олий маълумот олиш иштиёқи бўлган ёшларга имконият бериш керак. Кириш имтиҳонлари осон бўлсин. 1-2 йил ичида зўрлар ва зўракиларни ажратиб олиб давлат ва бизнес грантларини тақдим этиши мумкин.
Машаққатли билим олиш жараёни - тонналаб руда ичидан граммлаб олтинни ажратиб олгандек соҳа мутахассисларини тасодифлардан ажратиб олади. Бир парча қоғоз учун, ўзини алдаб, ўзи топмаган пулни совуриб юрганлар эса жуда қимматга “ўзини англаш” сабоқларини сотиб оладилар.
Олий таълим олиш учун “кириш осон, лекин чиқиш қийин” тизим бўлиши тарафдориман. Олий таълим жуда қиммат маҳсулот. У нафақат маблағ, балки кучли иштиёқ ва меҳнат талаб қилади.
Диплом - даражани белгиси бўлиши керак, кўзбўямачилик қуроли эмас.
Кескинроқ гапирган бўлсам узр сўрайман, мени қўллаб-қувватламаслигингиз мумкин, лекин ўзимизни алдашни бас қилайлик.
Ҳамма соҳага яхши мутахассислар керак. Миллионлаб дипломли саводсизлар мамлакатни хароб қиляпти. Бу муқаррар инқироз йўли.Олий таълим бериш тизими жиддий ислоҳ қилиниши шарт!
