Германияда мижоз 20 ёшли ёқилғи қуйиш шохобчаси кассирини ниқоб тақишни талаб қилгани учун отиб ўлдирди
Германиянинг Рейнланд-Пфалтс федерал штатининг Идар-Оберштейн шаҳрида шохобчага келган мижоз 20 ёшли ёқилғи қуйиш шохобчаси кассирини ниқоб тақишни талаб қилгани учун отиб ўлдирди. Бу ҳақда “DW” маҳаллий полицияга таяниб хабар берди.
Тафсилотларга кўра, 49 ёшли эркак ёқилғи қуйиш шохобчасига келган. Кассир жамоат жойларида ниқоб тақиш талабини эслатиб, унга хизмат кўрсатишдан бош тортди.
Шундан сўнг мижоз уйига бориб тўппончасини олган ва ёнилғи қуйиш шохобчасига қайтган. Бу гал у тиббий ниқобда бориб, касса олдида атай ниқобини ечади. Кассир унга яна танбеҳ берганида, мижоз йигитни отиб ташлаган. Прокуратуранинг хабар беришича, мижоз "қурбоннинг бошига қасддан ўқ узган".
Мижоз кейин жиноят содир бўлган жойдан қочиб кетади ва эртаси куни эрталаб хотини ҳамроҳлигида полиция бўлимига келиб, қилган ишини тан олади. Тергов пайтида у карантин чекловларига қарши экани, пандемия туфайли психологик тазйиққа учрагани ва норозилик билдиришнинг "бошқа йўлини тополмаганини" тушунтирган.
Эркак ҳозирда ҳибсга олинган.
Насиба Тўхтаева
