Президент Самарқанддаги энг оғриқли муаммоларни санади
Хабарингиз бор, айни дамда ЎзЛиДеПдан Ўзбекистон Республикаси Президентлигига номзод Шавкат Мирзиёев самарқандликлар билан учрашувда ҳудуддаги мавжуд бир қатор муаммоларни санади.
— 170 мингдан зиёд аҳоли доимий иш ўрнига муҳтож, 65 мингга яқин оила доимий даромад манбаига эга эмас;
— Келгуси 5 йилда 200 минг ёшлар меҳнат бозорига кириб келишини ҳам, ҳисобга олиш зарур;
— Самарқанд мамлакатдаги аҳолиси энг кўп ҳудуд бўлиб, келгуси 5 йилда 4,5 миллионга етади. Уларга қулай яшаш шароитларни таъминлаш лозим;
— Вилоятнинг 1,6 миллион нафар аҳолиси марказлашган ичимлик суви билан таъминланмаган, 6 минг километр ички йўллар таъмирталаб ҳолатда;
— Электр тармоқлари эскиргани боис, вилоятда электр таъминоти аҳоли учун ҳам, тадбиркорлар учун ҳам энг жиддий масалалардан бири бўлиб қолмоқда;
— Туман ва шаҳарларда саноат бир маромда ўсаётгани йўқ;
Айниқса, хом-ашёга бой Қўшработ, Нуробод ва Оқдарё туманларида саноат ривожланиши анча орқада;
— Вилоятда қишлоқ хўжалиги имкониятларидан тўлиқ фойдаланилмаяпти. Булунғур, Жомбой, Самарқанд ва Ургутнинг мева-сабзавотчилик ва узумчилик, Нуробод, Қўшработ туманларининг чорвачиликдаги имкониятлари тўлиқ ишга солинмаяпти;
— Айрим ҳудудларида соғлиқни сақлаш ва таълим тизими ортиқча юклама билан ишламоқда;
— Соғлиқни сақлаш объектлари қувватини ошириш ва уларни замонавий жиҳозлаш талаб этилади.
Эслатиб ўтамиз, аввалроқ Шавкат Мирзиёев Самарқандга етиб боргани, СамДУга Шароф Рашидов номи берилиши ҳамда Давлатимиз раҳбари самарқандлик сайловчилар билан учрашгани ҳақида хабар берилган.
Чўлпоной Аҳмедова
