Қайниука поччасидан қасд олиш учун унинг акасини пичоқлади
Шу йилнинг 23 сентябрь куни Сурхондарё вилояти Узун туманидаги оилалардан бирида можаро келиб чиқади. Келишмовчилик оқибатида М. рафиқаси Х.ни калтаклайди.
Аёл қаттиқ калтаклангани туфайли туман тиббий бирлашмасига ётқизилади.
Воқеадан хабар топган Х.нинг укаси опасини нега урганини билиш мақсадида соат 15:00 атрофида поччаси олдига боради. Опаси ҳақида қайғурган ука поччасига тегишли бўлган миллий таомлар ошхонасига борган вақти ошхонанинг овқат пишириладиган қисмида у билан тортишиб қолади. Жанжал бошланган вақтда поччасининг акаси Р. ҳам ўша ерда бўлган. Х.нинг укаси ўзини ҳимоялаш учун чўнтагида олиб юрган ошхона пичоғи билан Р.нинг кўкрак қисмига жароҳат етказади. У зудлик билан шифохонага олиб кетилган.
Ҳолат бўйича тезкор тергов ҳаракатлари олиб борилиб, 23-сентябр куни Х.нинг укасига нисбатан Жиноят кодексининг 104-моддаси 2-қисми "й”, “э” ва “л” бандлари билан жиноят иши қўзғатилган.
Эслатиб ўтамиз, бундан аввал Самарқандда ер талашган фуқаро қўшниси томонидан пичоқлаб ўлдирилгани ҳақида хабар берилганди.
Мафтуна Режаббоева тайёрлади.
