“Осиё НАТО”си (QUAD) Вашингтонда йиғилиш ўтказди
Хавфсизлик бўйича тўрт томонлама мулоқот давлатлари (QUAD) ўзаро учрашув ўтказди. Бу ташкилот норасмий доираларда “Осиё НАТО”си деб ҳам аталади. Япония, АҚШ, Австралия ва Ҳиндистон QUADга аъзо давлатлар ҳисобланади.
Тўрт давлат 24 сентябрь куни Вашингтонда йиғилган. Космик ҳамкорлик, киберхавфсизлик ва 5G технологияларини ривожлантириш учрашувнинг асосий мавзуси бўлди. Хусусан, ушбу давлатлар иқлим ўзгариши ҳолатлари мониторинги ва табиий офатлар юзасидан сунъий йўлдош тасвирлари билан алмашишга келишиб олган. Шунингдек, улар инфраструктурада ҳамкорлик ва киберхавфсизлик бўйича махсус гуруҳ тузади.
Бундан ташқари, 2022 йилда коронавирус пандемиясига қарши махсус машғулотлар ўтказилиши мумкин. Учрашув якунида қабул қилинган коммюникеда дунё аҳолисининг катта қисми эмланиши, глобал соғлиқни сақлаш тизимининг молиялаштирилиши ва сиёсий бошқарувни мустаҳкамлаш масалалари муҳимлиги таъкидланган.
Афғонистон ҳам марказий мавзулардан бўлди. Япония, АҚШ, Австралия ва Ҳиндистон афғон муаммосидаги сиёсатини мувофиқлаштиришга келишиб олди.
Эслатиб ўтамиз, аввалроқ АҚШ, Австралия ва Буюк Британя ўртасида ҳарбий альянс тузилгани хабар қилинганди.
