Афғон халқи ҳам, толибларнинг ўзи ҳам урушдан чарчаган — Шавкат Мирзиёев
Андижонда сайловчилар билан учрашаётган президентликка номзод Шавкат Мирзиёев яна бир бор афғон муаммосига тўхталиб ўтди.
“Афғонистон нима қилсак ҳам қўшнимиз, қўшнини эса танлаб бўлмайди. Куни кеча чегарани бузиб ўтишга уринганлар йўқ қилингани ҳақида айтдим, бундан кейин ҳам шундай бўлади албатта. Чунки Ўзбекистон ўз дахлсизлигини бузишга йўл қўймайман.
Шу билан бирга, Афғонистонда тинчлик-осойишталик ўрнатилиши учун қўлимиздан келганича ёрдам беришга тайёрмиз. Бир нарсани билишимиз керак – афғон халқи ҳам, толибларнинг ўзи ҳам урушдан чарчаган.
Қўшнимиз билан дўстона муносабат муҳимлигининг яна бир мисоли – Қирғизистон. Сизлар чегарада яшайсизлар, ҳозир бемалол борди-келди қиляпсизлар. Биз Қирғизистон президенти Садир Нургожаевич дўстмиз билан барча муаммоларни биргаликда, бамаслаҳат ҳал қиляпмиз. Ҳал қилса бўлар экан-ку”, дея таъкидлади амалдаги президент.
Бундан аввалроқ Андижонда ЎзЛиДеПдан кўрсатилган номзод Шавкат Мирзиёевнинг сайловчилар билан учрашуви бошлангани ҳақида хабар берилганди.
