"Ҳудудларда юришим, одамларни рози қилиш, аҳоли жон бошига даромадни кўпайтириш" — Президент
Президент Шавкат Мирзиёев Сирдарё тумани “Ширин” маҳалласида яшовчи Дониёр Йўлдошев хонадонида бўлиб, оиланинг турмуш шароитлари билан танишди.
Президент матбуот хизмати хабарига кўра, бу уй юртимиздаги обод ҳовлилардан бири. 10 сотих томорқада мевали ва манзарали дарахтлар, сабзавотлар экилган. 30 бош наслли курка боқилиб, бир йилда 25 миллион сўмгача қўшимча даромад олинмоқда.
Давлатимиз раҳбари бу саъй-ҳаракатларни маъқуллаб, мана шундай обод хонадонлар кўпайиши кераклигини таъкидлади.
- Ҳудудларда юришим, ҳар кунги ҳаракатларимдан мақсад - одамларни рози қилиш, аҳоли жон бошига даромадни кўпайтириш. Илгари четга хомашё сотардик. Ҳозир ҳаммасини мамлакатимизда қайта ишлаб, тайёр маҳсулот чиқараяпмиз. Корхоналар очилаяпти, ёшларимиз, хотин-қизларимиз ишли бўлаяпти. Бундайлар кўпайиши, бунинг учун ривожланиш маҳаллада бўлиши керак. Маҳалла яхши бўлса, давлат кучли бўлади. Ёшларни билимли, ақлли қилиб тарбияласак, ўз йўлини, ишини топади, - деди Шавкат Мирзиёев.
Юртимизга тинчлик, фаровонлик тилаб, дуо қилинди.
Аввалроқ ЎзЛиДеПдан кўрсатилган номзод Шавкат Мирзиёев Сирдарё туманидаги саноат зонасида партия фаоллари, ёшлар ва ОАВ вакиллари билан учрашгани, “Сирдарё мега люкс” қўшма корхонаси фаолияти билан танишгани ҳамда Сирдарё вилояти тараққиёти борасида тўхталиб ўтгани ҳақида хабар берилганди.
