37 ёшни қарши олган Павел Дуров ҳаётий қадриятлар ҳақида гапирди

 

 

Telegram aсосчисининг фикрича, ҳаётда қуйидаги уч неъматнинг қадрига етилмайди:

 

• Уйқу. Уйқу иммунитетни, ижодий қобилиятларни ва психологик барқарорликни оширади.
• Табиат. Табиат – биз ўзимизни яхши ҳис қилишимиз учун зарур бўлган муҳитдир.
• Ёлғизлик. Ёлғизлик маънавий ва интеллектуал ривожланиш учун имкон беради.

 

Дуровга кўра, қуйидагиларга ҳаётда ҳаддан ташқари кучли эътибор қаратилади:

 

• Катта шаҳарлар. Улар ифлосланиш, шовқин ва жиноятчиликнинг манбаси ҳисобланади. Унинг имкониятларидан фойдаланиш лозим, аммо иложи борича шаҳардан ташқарида яшаш керак.
• Ресторанлар. Ресторанлар овқатланишнинг энг секин ва самарасиз усули ҳисобланади.
• Иссиқ ҳаво. Иссиқ ҳаво саратон ва эрта қаришга олиб келади. Совуқроқ иқлим тана, руҳ ва онгни тозалайди.
• Мода. Тўхтовсиз ўзгарадиган тенденцияларга мослашишга ҳаракат қилиш, қимматга тушади. Ва бу аслида кераксиз ҳам. Қулай кийим кийиш ҳаётни соддалаштиради, қолаверса жавонингизда бошқа муҳим буюмлар учун ҳам жой қолади. 
• Кўчмас мулк. Кўчмас мулк сотиб олиш одатда шубҳали инвестиция бўлиб, танловни чеклайди. Ижара эса ҳаракат учун кўпроқ имконият тақдим этади.
• Ижтимоий тармоқлар. Ижтимоий тармоқлардан келаётган “ахлат” оқими бахт ва креативликни камайтиради.Интернет-сервисларни ўчириб қўйиш –– кун давомида қилишимиз мумкин бўлган энг яхши иш.
• Машҳурлар маслаҳати. Таниқли инсонлар одатда асосланмаган маслаҳат беради. Ҳаётда муҳим қарорлар қабул қилиш учун қатъий илмга ва экспертлар фикрига эътибор бериш керак.

 

Бундан аввал Павел Дуров 2011 йилдан буён кузатув остида эканини маълум қилганди. Шунингдек, Telegram'да хайрия маблағлари йиғиш имкони пайдо бўлгани хабар қилинган эди.

 

Жаҳонгир Қўзиев