Россия Ўзбекистоннинг 150 минг фуқаросига мамлакатга киришга қўйилган тақиқни олиб ташлади (видео)
Россия Федерацияси Ички ишлар вазирлиги тақиқи бўлган 150 минг ўзбекистонлик ва 150 минг тожикистонлик меҳнат мигранти учун мамлакатга киришга рухсат берди.
Миграция агентлигининг хабар беришича, Россия мигрантлар федерацияси раҳбари Вадим Коженовнинг маълум қилишича, юқоридаги мигрантлар тоифасига фақат Ички ишлар вазирлиги томонидан тақиқ қўйилган фуқаролар киради. Суд қарори билан тақиққа тушган фуқаролар учун Россия чегараси белгиланган муддатга қадар ёпиқ ҳисобланади.
Қайд этилишича, амнистияга тушган фуқаролар жорий йил 18 август куни маълумотлар базасидан олиб ташланган. Шу билан бирга, фуқаро унга мамлакат ҳудудига киришга рухсат берилганига ишонч ҳосил қилиш учун Ички ишлар вазирлиги сайтидан маълумотларни текшириб кўриши мақсадга мувофиқ.
Шунингдек, миграцион рўйхатдан ўтган, лекин рухсат берувчи ҳужжатларини жорий йил 30 сентябргача узайтиришга улгурмаган меҳнат мигрантлари шу йилнинг 30 декабригача ҳужжатларини расмийлаштириши мумкин.
Маълумот учун, эндиликда Россия ҳудудида ишлаш ҳуқуқини берувчи патент олишда талаб этиладиган тиббий кўрик Россия Соғлиқни сақлаш вазирлиги томонидан Тошкентда ўрнатилган тиббий асбоб-ускуналар ёрдамида амалга оширилади.
Аввалроқ ўзбекистонлик қурувчиларни Россияда “космик истиқболлар” кутаётгани, Россияда миграция тўғрисида ягона ҳужжат жорий этилгани, ўн минг ўзбекистонлик яқин вақт давомида Россияга ишга жалб қилиниши, Ташқи Меҳнат миграцияси орқали ишлашга кетган фуқароларнинг норозилиги, шунингдек, Россияда юз берган оммавий муштлашувда иштирок этган мигрантлар 40 йилга депортация қилингани ҳамда Россия мигрантларга янги мажбурият юкламоқчилиги ҳақида хабар берилганди.
