Moderna вакцина ишлаб чиқаришни кенгайтиришга қарор қилди
Moderna коронавирусга қарши эмлаш формуласини дунё билан баҳам кўрмайди, аксинча, ўзи дори ишлаб чиқаришни кўпайтиради. Бу ҳақда компания раиси Ноубар Афеян маълум қилди, деб ёзади "Assosiated Press".
Унинг таъкидлашича, компания раҳбарияти формулани алмашиш ўрнига ўз вакцинасини ишлаб чиқаришни кенгайтиришга қарор қилган. Moderna бир йилдан кам вақт ичида ишлаб чиқаришни бир миллиард дозага етказди.
Биз 2022 йилда препарат ишлаб чиқаришни 1 миллиарддан 3 миллиардгача кўпайтиришимиз мумкин,
деди Афеян.
Унинг айтишича, компания АҚШ ҳукумати билан ҳамкорлиги туфайли камбағал мамлакатларга катта миқдорда вакциналар етказиб берган. Моderna, шунингдек, ҳозирда бир қанча камбағал мамлакатларга дори етказиб беришда ёрдам бериш устида иш олиб бормоқда. Афеяннинг сўзларига кўра, жорий йилнинг охирги уч ойида 40 миллион доза вакцина етказиб беради, қолгани эса кейинги йилга юборилади.
Бундан аввал Британия махсус хизматлари Россияни AstraZeneca таркибини ўғирлашда айблагани ҳақида хабар берилганди.
