Бенкси — стрит-арт қироли

 

BBCнинг маълум қилишича, машҳур рассомнинг “Ахлат қутисидаги севги” тасвири Sotheby’s аукционида 16 миллион фунт (25.4 миллион доллар) га сотилди. У аслида “Шар кўтарган қизалоқ” деб номланган ва 2018 йилда қарийб 1.5 миллион долларга баҳоланган эди. Аммо шундан кейин расм қисқариб кетган ва умуман ўзгартирилган эди.

 

zamon.uz давримизнинг энг машҳур ва сирли рассомларидан бирининг турли вақтларда яратилган машҳур асарларини намойиш қилади.

 

“Ғазо секторидаги мушукча”

 

 

Ғазо сектори дунёдаги энг нотинч нуқталардан бири. Унинг аҳолисини қарийб ярми болалардан иборат. 2015 йилда Бенкси Ғазо секторига боради ва вайроналар орасидаги мушукча расмини чизади. Ундаги контраст ноодатий эди: вайроналар ва ўйнаб турган мушук. “Бу мушук бутун дунёга унга айни пайтда тинчлик ва хурсандчилик кераклигини айтмоқда. Аммо у нимани ўйнашни топиб олди (мушук бир уюм темир билан бирга тасвирланган). Бизнинг болаларимиз-чи?” –, дейди маҳаллий аҳоли вакилларидан бири.

 

“Рождество билан!”

 

 

Расмда бир қарашда қор остида турган бола кўринади. Аммо деворнинг бошқа бурчагида ёниб турган чиқинди қутисини кўриш мумкин. Бенкси буни Уэльсдаги Порт-Телбот шаҳрида чизган. Шаҳар экологик ҳолати ўта ёмон. Бенкси бу орқали салбий экологик муҳитга эътибор қаратган.

 

Қизиқарли томони, расм чизилган гараж эгаси уни 100 минг фунтга сотган. Аммо бир шарт эвазига: расм шаҳарда қолади. Порт-Телбот аҳолиси қачондир бу тасвир шаҳарнинг табиий муҳитини яхшилашига умид қилади.

 

“Смартфонли севишганлар”

 

 

Ушбу расм Broad Plains Boys клуби эшигига чизилган. Клуб аслида ёпилиб кетиш арафасида эди. Аммо вазиятга Бенкси аралашади. Натижада бизнеси барбод бўлиш арафасида турган клуб эгаси эшикни 400 минг фунтга сотишга муваффақ бўлди.

 

Расмнинг маъноси яққол кўриниб турибди: ижтимоий тармоқлар ва смартфонлар даврида виртуал олам жонли мулоқотни чеклаб қўймоқда.

 

Жаҳонгир Қўзиев

Умар Умрзоқов