Ўзбекистон ва Афғонистон икки томонлама муносабатларни ривожлантиришга қаратилган “йўл харитаси”ни ишлаб чиқади — Забиҳулло Мужоҳид
Ўзбекистон ва Афғонистоннинг вақтинчалик ҳукумати Термиздаги музокаралар давомида икки томоннинг манфаатлари акс этган масалаларга ечим топиш мақсадида ишчи гуруҳлар тузишга келишиб олган. Бу ҳақда “Толибон” расмий вакили Забиҳулло Мужоҳид маълум қилди.
“Бош вазир ўринбосари Абдул Салом Ханафий бошчилигидаги Афғонистон делегацияси Ўзбекистондан қайтиб келди. Ўзбекистон томони билан ўтган музокаралар якунида ишчи гуруҳлар тузилди. Унда долзарб муаммолар муҳокама қилинади ва раҳбариятга хулосалар тақдим этилади”, – деган Мужоҳид.
Шунингдек, Ўзбекистон ва Афғонистон ҳукуматлари 10 кун давомида икки томонлама муносабатларни ривожлантиришга қаратилган “йўл харитаси”ни ишлаб чиқади ва давлат раҳбарларига тақдим этади.
16 октябрь куни Термиз шаҳрида Ўзбекистон ҳукумати ва Афғонистон вақтинчалик ҳукумати делегациялари учрашуви бўлиб ўтди. Ўзбекистон делегациясига Бош вазир ўринбосари Сардор Умрзоқов бошчилик қилган.
Аввалроқ ТИВнинг музокаралар якуни бўйича баёноти эълон қилинганди.
Жаҳонгир Қўзиев
