Кўп квартирали уйнинг ертўласидан фойдаланиш тартиби белгиланди
Ҳукумат қарори билан кўп квартирали уйнинг ертўласидан фойдаланиш тартиби тўғрисидаги низом тасдиқланди.
Унга кўра, ертўладан фойдаланиш кўп квартирали уй-жой мулкдорининг розилигига асосан амалга оширилади.
Ертўладаги жойлар фақат ертўлада шуғулланиш мумкин бўлган қуйидаги фаолият турларини амалга ошириш учун берилади. Жумладан, озиқ-овқат ва ноозиқ-овқат товарлари билан савдо қилиш: дўконлар, киоскалар, дўкончалар ва яна шунга ўхшаш бошқа фаолият билан шуғилланиш мумкин. Шунингдек, маиший хизмат кўрсатиш, жумладан, сартарошхона, пойбзал тикиш ва таъмирлаш, оптика, соат созлаш устахоналари, тикувчилик ва каштачилик, ателе кабилар шулар сирасига киради.
Бундан ташқари, умумий овқатланишдан иборат ресторанлар, кафе, кафетерийлар, музқаймоқ ва чанқовбосди ичимликлар барлари, газакхоналарга ҳам ертўладан фойдаланишга рухсат берилади.
Эндиликда банк, алоқа хизматларини кўрсатиш учун ҳам ертўладан фойдаланиш мумкин. Бунда банкнинг бўлимлари ва валюта алмаштириш пунктлари назарда тутилган.
Почта бўлими ва курерлик фаолияти, газеталар, журналлар ва китоб маҳсулотлари билан савдо қилиш бутиклари ҳам ертўлада ташкил этилиши эркин тарзда амалга оширилади. Бижутерия ҳамда жевакларни тайёрлаш ва таъмирлаш ишлари ҳам кўп қаватли уйлар ертўласида ташкил этилиши мумкин.
Бундан ташқари:
● гулчамбарлар, сунъий гуллар ва гул маржонларини тайёрлаш;
● рассомлик ва ҳайкалтарошлик;
● хизмат кўрсатиш ва тадбиркорларнинг офислари ҳамда идоралари;
● видео ва фотосуратга олиш, компютер хизматлари;
● таржима ва таҳрир хизматлари;
● дизайн, чизмачилик-графика хизматлари;
● кийим-кечак ва идишларни ижарага бериш хизмати;
● риелторлик фаолияти;
● газламаларга нақшлар солиш, трафаретли босма ва қўлда расм чизиш хизматлари;
● жисмоний тарбия ва спорт муассасалари фаолияти;
● давлат ташкилотларини жойлаштириш;
● суғурта ташкилотларини жойлаштириш ҳам шулар сирасига киради.
Эслатма: мазкур фаолият турлари ёнғинга қарши ва техник шартларнинг минимал талабларига амал қилинган тақдирда ташкил этишга рухсат берилади.
Ертўладан фойдаланганлик учун тўланадиган ижара тўловларининг энг кам миқдорлари тегишлича Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари томонидан тасдиқланади.
Ижара тўловлари ушбу кўп квартирали уйнинг умумий мол-мулкини сақлаш харажатларига йўналтирилади.
Эслатма: ертўладан фойдаланувчи томонидан уни бошқа шахсларга сотиш, ҳадя этиш, гаровга қўйиш ва ижарага беришга йўл қўйилмайди.
Бундан аввал айрим ходимларга уй-жой ижараси учун ҳар ойлик пул компенсациясидан даромад солиғи ундирилмаслиги ҳамда ертўлада қиморхона очган 21 ёшли шахс устидан жиноий иш қўзғатилгани ҳақида хабар берилганди.
Оламгир Абдиев
