"Спутник"да 149 гектарни ўз ичига олган эски ёғоч уйлар бузилиб, ўрнига кўп қаватли янги уйлар қурилади
Янгиҳаёт туманининг "Спутник" даҳасида 149 гектар ҳудудда хавфсизлик талабларига жавоб бермайдиган икки ва бир қаватли ёғоч уйлар мавжуд.
Бу уйлар 1966 йилги зилзиладан сўнг вақтинча фойдаланиш учун тез фурсатда қурилган.
Президент Шавкат Мирзиёев Тошкент шаҳридаги эски уйлар бўйича ўз режасини маълум қилди.
— Шаҳар ҳудудидаги авария ҳолатига келган, 60-70 йил аввал қурилган кўп қаватли уйлар ўрнига замонавий турар-жойларни барпо этиш бўйича "Реновация дастури" амалга оширилади. Бунда ушбу уйларда яшайдиган аҳолини рози қилиб, уларга янги уйлардан мақбул таклифлар берилиши шарт. Бирор киши норози бўлмаслиги лозим. Агар ўша уйларда яшовчи аҳоли бошқа ҳудудга кетишни истамаса, янги қурилаётган уйлардан хонадон олади, — деди Шавкат Мирзиёев.
"Спутник" даҳасидаги яшашга яроқсиз ҳолга келиб қолган 400 дан зиёд 1 ва 2 қаватли ёғоч уйлар ўрнида янги кўп қаватли уйлар қурилиб, 4,5 минг оила янги замонавий хонадонлар билан таъминланади.
Муножат Валиева
