Ўзбекистон Президенти сайлови — Саудия Арабистони газетаси нигоҳида
Саудия Арабистонининг етакчи нашрларидан бири бўлган "Al-Muashshir al-Iqtisadiy" газетасида "Ўзбекистон 24 октябрь куни бўлиб ўтадиган Президент сайловига тайёргарлик кўрмоқда" номли мақола чоп этилди.
"Дунё" ахборот агентлиги хабарига кўра, мақолада Ўзбекистон Президенти сайловига кўрилаётган тайёргарлик ишлари, сайлов жараёнининг миллий сайлов қонунчилиги, тан олинган халқаро стандартлар ва демократик тамойилларга мувофиқ, очиқ ва ошкора ўтказилиши бўйича амалга оширилаётган ишлар ҳақида сўз боради.
Мақолада хорижий давлатларда бўлиб турган фуқароларнинг Ўзбекистон Президенти сайловида иштирокини таъминлаш бўйича бажарилаётган ишларга ҳам алоҳида эътибор қаратилган.
"Ўзбекистон дипломатия ваколатхоналари жойлашган 38 мамлакатда 54 та сайлов участкаси ташкил этилган. Шунингдек, 128 та шаҳарда ва дипломатия ваколатхонаси бўлмаган 11 та давлатда 310 дан ортиқ овоз бериш нуқталари ўрин олган", — дейилади мақолада.
Эслатиб ўтамиз, Ўмон Султонлигининг "Asdaa Oman" газетасида "Сайловолди тайёргарлик ишлари якунлангач, 24 октябрь куни Ўзбекистонда Президент сайловлари ўтказилади" сарлавҳали мақола чоп этилганди.
Аввалроқ Ҳиндистондаги “Political Events” журнали саҳифасида “Янги Ўзбекистон замонавий ташқи сиёсатининг халқаро-ҳуқуқий асослари мустаҳкамланмоқда” сарлавҳали мақола босилиб чиққани ҳамда “Янги Ўзбекистон” боғи ва Мустақиллик монументининг тантанали очилиши Жанубий Кореянинг "The Korea Post" журнали саҳифаларида чоп этилгани ҳақида хабар берилганди.
