Гурбангули Бердимуҳамедов Ўзбекистон Президентини самимий қутлади
Бўлажак мулоқотлар, шу жумладан минтақавий ташкилотлар доирасидаги учрашувлар режаси кўриб чиқилди.
Бугун, 25 октябрь куни Ўзбекистон Республикаси Президенти Шавкат Мирзиёевнинг Туркманистон Президенти Гурбангули Бердимуҳамедов билан телефон орқали мулоқоти бўлиб ўтди. Бу ҳақда Президент матбуот хизмати хабар берди.
Қайд этилишича, Туркманистон етакчиси давлатимиз раҳбарини Ўзбекистон Республикаси Президенти сайловидаги ишончли ғалабаси билан дилдан қутлади. Юртимизни модернизация қилиш ва унинг халқаро нуфузини юксалтиришга қаратилган самарали ислоҳот ва янгиланишлар давом эттирилиши тиланди.
Бўлажак мулоқотлар, шу жумладан минтақавий ташкилотлар доирасидаги учрашувлар режаси кўриб чиқилди.
Эслатиб ўтамиз, жорий йил 4-5 октябрь кунлари Тошкент шаҳрида бўлиб ўтган олий даражадаги расмий тадбирлар якунида эришилган келишувларни амалга ошириш масалалари муҳокама қилинганди.
Аввалроқ МСК президент сайловларининг дастлабки натижаларини эълон қилганди.
Бундан аввал Россия Федерацияси Президенти Владимир Путин, Туркия Республикаси Президенти Режеп Таййип Эрдоған ҳамда Қозоғистоннинг Биринчи Президенти, Элбоши Нурсултон Назарбоев Президент сайловида эришган ғалабаси билан самимий қутлашгани ҳақида хабар берилганди.
