Илон Маск қандай маркадаги кийим, поябзал кияди ва соат тақади?
Илон Маск ҳозирда дунёнинг энг бой одамларидан бири саналади. Унинг бойлиги айни кунларда 300 миллиард долларга яқинлашмоқда.
Шу боис Space X ва Тесла бош директорининг кийим-кечаклари, поябзаллари ва аксессуарлари қанча туради ва у қайси брендларни афзал кўриши кўпчиликни қизиқтириши шубҳасиз.
Илон Маск ўзини кўз-кўз қилишни ёқтирмайди. Шу боис кийим танлашга ҳам кўп вақт сарфламайди. Бу борада у Форбес рейтингининг бошқа етакчиларига, масалан, Жефф Безос ва Билл Гейтсга ўхшаб кетади.
Маскнинг одатий кийиб юрадиган формаси футболка, жинси шимлар ва кўзга ташланмайдиган кроссовкалардир. Бироқ у баъзида бу одатийликка ўзгартириш киритиб туради.
“Givenchy”
Май ойида Илон Маск “Saturday Night Live” ток-шоусининг суратга олиш маросимига Метю Уилямснинг “Givenchy” учун тикилган илк коллекциясидаги костюмда келди. Бу нафақат янгилик, балки миллиардернинг дизайнерга кўрсатган ёрдами ва марҳамати эди. Таъкидлаш керак, Маскнинг айнан шу кийимдаги чиқишини Youtube’да 9,5 миллион одам кузатган.
“Belstaff”
Миллиардерни теридан тикилган устки кийимда тез-тез кўриш мумкин. Ёқаси кўтарилган байкер ёки қўй териси билан безатилган катта ўлчамли бомбардимон кўйлаги шулар жумласидан.
Мазкур кийимлар дизайни муаллифини енгидаги нақшдан таниб олиш мумкин. ХХ асрнинг бошларида ушбу логотипни инглиз бренди “Belstaff” танлаган. Ўз вақида бу бренднинг сув ўтказмайдиган курткаларини "Қора рицар", "Авиатор", "Терминатор" фильмлари қаҳрамонлари кийган.
"Nike"
Маск одатда номаълум брендлардан кўра, классик, паст пошнали этик ёки оддий кроссовкалар кийишни афзал кўради. Бироқ 2019 йилда “Tesla Model Y” электр кроссоверининг тақдимоти учун “Nike” компаниясига оёқ кийим буюртма берди. Бренд қора питон терисини ифодалайдиган моделини яратди. Унда лазер билан кесилган қизил ранг ва Тесла логотипи туширилган эди. Миллиардер ўзига хос янгиликдан шунчалик хурсанд бўлган эдики, оқибатда саҳнадаги чиқишида оёқларини кўтариб, жанговар ҳаракатларга тақлид қилган.
"Tag Heuer"
Илон Маск тақадиган деярли ягона соат, бу – “Tag Heuer Carrera Calibre 1887” бўлиб, у Space X билан ҳамкорликда ишлаб чиқилган. Модел думалоқ зангламайдиган пўлатдан ишланган корпусга эга. Унда араб рақамлари ва “Космосдаги биринчи швейцариялик соат” ёзуви туширилган. Мазкур соатлар 2012 йилдан чекланмаган миқдорда чиқа бошлади. Унинг нархи бошланишига 6 минг доллар (420 минг рубл) бўлган.
Шунингдек, Илон Маск космик кординаталарининг суратлари туширилган кийимларни ёқтиради. Костюм ёки курткаларининг остидан кийиб юрадиган футболкаларидаги тасвирларда ўша кординаталарнинг нақшинкор тасвирини кўриш мумкин. Бундай футболкаларнинг нархи 32 доллар туради.
Миллиардер классик либосларни кийишни унчалик хушламайди. Бундай кийимларда у ўзни ноқулай сезишини кўп бор таъкидлаган.
Бундан аввал дунёнинг энг бой одамлари рўйхати ўзгаргани, Илон Маск дунёни тирбандликлардан халос этмоқчи эканлиги ҳамда 2020 йилда Илон Маскнинг қанча ойлик маош олгани маълум бўлгани ҳақида хабар берилганди.
Оламгир Абдиев
