Матодан батареяларгача. Ёнғин келтириб чиқариши мумкин бўлган объектларни биласизми?
Биз ёнғин келиб чиқмаслиги учун доим огоҳ бўлишга ҳаракат қиламиз. Хонадан чиқиб кетаётганимизда барча чироқларни ўчирамиз. Токка тиқилган жиҳозларни ҳам узиб қўйишни унутмаймиз. “Газ чиқмаяптими?”, деб қайта-қайта қараймиз. Бундан ташқари, “телевизорни ўчирдимми ё йўқми”, деб бир бекат масофадан уйга қайтган пайтимиз ҳам бўлади. Нима сабабдан? Албатта, ёнғин оқибатидан қўрқамиз.
Таъкидлаш керак, ҳар доим ҳам токка тиқилган анжом ёки ёниқ қолган телевозор, радио хавфли бўлавермайди. Бу ғалати туюлиши мумкин, бироқ буни изланишлар исботлаган. Аксарият ҳолларда ёнғин муаммоси бутунлай ғайриоддий нарсалардан келиб чиқади.
Ёғ шимган матолар
Мутахассисларнинг айтишича, кимёвий моддалар билан намланган латталар ёниқ турган электр жиҳозидан ҳам хавфли ҳисобланар экан. Айниқса, мато машина мойи ёки ёнғинга ўч бирор эритма шимган бўлса. Изланишлар шуни кўрсатадики, ҳаводаги кислород таъсирида матодаги кимёвий бирикмалар оксидланади ва матонинг ёнишигача бўлган ҳарорат пайдо бўлиши мумкин.
Уйингиз, гаражингиз ёки устахонангизни хавфсиз сақлаш учун турли хил кимёвий моддалар билан намланган латталарни сув билан тўлдирилган идиш ва маҳкам ёпиладиган идишда сақланг. Энг яхшиси, бундай чиқиндиларни ишлатгандан кейин дарҳол йўқ қилишдир.
Батареялар
Батареяларни стол тортмаларида сақлмаганингиз маъқул. Улар, айниқса, электр зарраларига реакция билдирадиган метал буюмлар билан бирга қўйилса, жуда хавфлидир.
Кераксиз батарея ва аккумуляторларни ўз вақтида утилизация қилиш тавсия этилади. Шунингдек, электр қутбларини ёпишқоқ лента билан ёпиб қўйган яхши.
Уй ҳайвонлари ва кемирувчилар
Статистик маълумотларга кўра, уй ҳайвонлари ҳам ёнғин чиқишига сабаб бўлиши мумкин.. Бунда кабелларнинг тишланиши, чайналиши ва тешилиши назарда тутилади. Агар кабел ичидаги симлар очиқ қолса, бу ёнғин хавфини орттиради.Бунинг олдини олиш учун кабелларни юқорироқ жойдан ўтказган маъқул.
Ноутбуклар
Ноутбукни ёстиқ, адёл ёки кўрпа устида ёниқ ҳолда қолдирмаслик керак. Чунки қурилманинг остида маторчасига ҳаво етказиб турадиган тешикчалар мавжуд ва бу орқали қурилма ўзини ўзи совутиб туради. Унинг ёпилиб қолиши ноутбукнинг қизиб кетишига олиб келади. Оқибатини эса, айтмаса ҳам бўлади.
Шунингдек, қизиб кетган электрон қурилмаларни тез-тез ўчириб совутиб туриш маслаҳат берилади.
Лампочка
Бунда лампочкага келадиган кучли ток босими назарда тутилади. Гарчи у заводда ишлаб чиқарилган бўлса ҳам бу унинг ишончли эканига кафолат бермайди. Лампочка нафақат ёрилиб синиши, балки унга ток берадиган кабеллар эриб кетиши ҳам мумкин.
Бундан ташқари, мутахассислар соч қуритгич, чанг ютгични ҳам ёнғин келтириб чиқарадиган объектлар қаторига киритади. Уларнинг фильтрларини тез-тез кўздан кечириш, агар чанг ёки чиқинди тўлган бўлса, вақтида тозалаш тавсия қилинади.
Оламгир Абдиев
