Эрталаб бош оғриғига нима сабаб бўлади?

 

Мигрень

 

Мутахассисларнинг таъкидлашича, ер юзидаги 10-20 % одамни мигрень муаммоси қийнайди. Тонгги соат 4 дан 8 гача организмда кам миқдорда эндорфин ва энкефалин, шунингдек, қон босимини ошишига сабаб бўладиган адреналин ажралиб чиқади. Шунинг ҳисобига эрталаб бош оғриғи безовта қилиши мумкин. Мигренда, асосан, бошнинг бир тарафида ўқтин-ўқтин оғриқ, кўнгил айниши кузатилади. Оғриқ кучлилигидан ишлаш ва дам олишга лаёқат бўлмаслиги мумкин. Бу вақтда неврологга мурожаат қилиш керак.

 

Уйқусизлик ёки чала ухлаш

 

Уйқу билан боғлиқ муаммо организмнинг тонгги тикланишига халақит беради, бунинг оқибатида эса бош оғриғи кузатилади. Организм тиниқиб олиши, энергияга тўла бўлиши ва саломатликда муаммолар кузатилмаслиги учун ҳам мутахассислар кунига 7-8 соат ухлаш кераклигини таъкидлайди. Шундай экан, муаммо келиб чиқмаслиги учун бир вақтда ётиб, бир вақтда туришга одатланинг, кундузи ухламанг. Ётоқхонангиз тинч, ортиқча шовқинларсиз, қоронғи бўлишига эътибор беринг.

 

Кофеин етишмаслиги синдроми

 

Қаҳвага қарам инсон тўсатдан қаҳва ичмай қолганида мазкур синдром кузатилади. Қаҳва таркибидаги кофеин мияга таъсир қилади, уни истеъмол қилишдан тўхташ эса бош оғриғига сабабчи бўлиши мумкин. Қаҳва ичишни тўхтата олмасангиз, ичиш миқдорини камайтиринг. Кунига 1-2  финжондан ортиқ қаҳфа ичмаслик тавсия қилинади.

 

Чўлпоной Аҳмедова тайёрлади