Миришкорда МЧЖ собиқ директори 600 миллион сўмдан зиёд чорва молларни "ухлатиб кетди"
У сотувдан тушган маблағларни жамият ҳисоб рақамига кирим қилмасдан талон-тарож қилгани аниқланган.
Бош прокуратура ҳузуридаги Иқтисодий жиноятларга қарши курашиш департаменти хабарига кўра, департаментнинг Миришкор туман бўлими томонидан “Ўзбекистон қоракўлчилик” МЧЖнинг Миришкор туман филиалининг мурожаатига асосан тергов ўтказилди.
Маълум қилинишича, терговга қадар текширувда МЧЖ собиқ раҳбари Ч.Х. ўзининг жавобгарлигида бўлган умумий баҳоси 604,7 миллион сўмлик жами 2 429 бош майда шохли молларни сотиб юбориб, сотувдан тушган маблағларни жамият ҳисоб рақамига кирим қилмасдан талон-торож қилгани аниқланган.
Мазкур ҳолат юзасидан Жиноят кодексининг 167-моддаси (талон-торож қилиш) ва 205-моддаси (ҳокимият ёки мансаб ваколатини суиистеъмол қилиш) билан жиноят иши қўзғатилиб, тергов ҳаракатлари ўтказилмоқда.
Аввалроқ 447 та ширкатда 163 та 12,9 миллиард сўм миқдоридаги қонунбузарлик ҳолати аниқлангани, Тошкентда 400 миллион сўмдан ортиқ пулни талон-тарож қилган ширкат раҳбари қўлга тушгани, Термиз шаҳрида кўмир маҳсулоти талон-тарож қилингани ҳамда Марғилонда ХТБ собиқ мудири 1,7 миллиард сўмни ўзлаштириб юборгани ҳақида хабар берилганди.
