Белгиланган муддатдан 25 кун ўтган бўлса ҳам, бюджет лойиҳаси ва бюджетнома Қонунчилик палатасига киритилмаган

 

2022 йил учун янгиланган фискал стратегия Молия вазирлиги томонидан ишлаб чиқилганми ёки йўқ, бу савол сўроқ остида қолмоқда.

 

Олий Мажлис Қонунчилик палатаси депутати Дониёр Ғаниев 2022 йил учун бюджет лойиҳаси ишлаб чиқилиши чўзилиб бораётганлигини маълум қилди.

 

Маълумки, бюджет кодексининг 97-моддасига асосан, Давлат бюджети тўғрисидаги қонун лойиҳаси ва бюджетнома Вазирлар Маҳкамаси томонидан Олий Мажлис палаталарига, қоида тариқасида, жорий йилнинг 15 октябридан кечиктирмай киритилиши белгиланганди.

 

Аммо 2021 йил 9-ноябр ҳолатига, яъни белгиланган муддатдан 25 кун ўтган бўлса ҳам, бюджет лойиҳаси ва бюджетнома Қонунчилик палатасига киритилмаган. Шунингдек, фискал стратегияси Вазирлар Маҳкамаси томонидан жорий йилнинг 15 июнига қадар тасдиқланиши ва тасдиқланган фискал сртатегияси Олий Мажлис палаталарига тақдим этилиши ҳамда жамоатчилик учун Молия вазирлиги веб-сайтида эълон қилиниши ҳам  белгиланганди.

 

Шу  муддатдан деярли 5 ой  вақт ўтган бўлсада, ўрта муддатли фискал стратегия низоми  Олий Мажлис палаталарига киритилмагани ҳамда  Молия вазирлиги веб-сайтида эълон қилинмагани ҳам ошкор бўлган.

 

“Бюджет лойиҳасини Олий Мажлис палаталари томонидан кўриб чиқилиши учун ҳам етарлича вақт берилиши керак. Гарчи амалда депутатлар бюджет лойиҳаси параметрларига жиддий ўзгартириш ёки қўшимча киритолмасаларда, лекин бюджет муҳокамаси учун бюдкет кодексида белгилангандек, қоида тариқасида, Қонунчилик палатасига ҳам камида 1 ой муддат қолдирилиши лозим. Умид қиламанки, бюджетномани киритишда кечикилган вақт уни Олий Мажлис палаталарида кўриб чиқиладиган муддатни қисқартириш ҳисобига қопланмайди”, — дейди депутат.

 

Эслатиб ўтамиз, аввалроқ Қонунчилик палатаси вакиллари 6 ойда нималар қилгани  ҳамда Олий Мажлис Қонунчилик палатаси спикери қуйи палата депутатлари орасида вакцина олмаганлар сонини очиқлагани  ҳақида хабар берилганди.

 

Чўлпоной Аҳмедова