Энергетик ичимликлар рекламаси тақиқланди

 

Олий Мажлис Қонунчилик палатасининг 16 ноябрь куни бўлиб ўтган ялпи мажлисида "Реклама тўғрисида"ги қонун лойиҳаси депутатлар томонидан кўриб чиқилган ва реклама материалларида муаллифлик ҳуқуқига таъсир қилувчи, порнография тусидаги ахборотлар ҳамда давлат рамзларидан фойдаланишга тақиқ қўйилганди.

 

Депутатлар томонидан бунга қўшимча равишда қонуннинг яна 2 та моддасига ўзгартириш киритиш таклифи берилди.

 

Хусусан, жамоатчилик орасида кенг муҳокама қилинаётган энергетик ичимликлар мавзусида кенг бахс-мунозаралар олиб борилди. Кўплаб муҳокамалардан сўнг, "Реклама тўғрисида"ги қонун ташқи объектлар орқали энергетик ичимликларни реклама қилишни тақиқловчи норма билан тўлдирилди. Шунингдек, коррупцион ҳолатларнинг олдини олиш учун мазкур қонуннинг 25-моддасига ўзгартириш киритиш масаласи илгари сурилди.

 

Маълумот учун, мазкур моддада реклама жойлаштириш ҳуқуқи ауцион орқали 10 йил муддатга берилиши белгиланганди. Ушбу 10 йилликдан сўнг аукцион савдосисиз яна шунча муддатга реклама ҳуқуқини олиш нормаси ҳам келтирилганди.

 

Депутатнинг фикрича, бу нормага тузатиш киритилиши ва муддат тугагандан сўнг реклама ҳуқуқи яна ауцион орқали, ғолиб бўлган шахсга берилиши керак. Йўқса, ушбу ҳолат коррупция шаклланишига олиб келиши мумкин.

 

Таклифлар орасида дори воситалари рекламасини тақиқлаш ҳақида ҳам фикрлар берилди. Ташаббус кўрсатганларнинг фикрича, намойиш қилинаётган дориларнинг катта қисми инсон саломатлиги учун зарарли. Шунингдек, реклама таъсирида аҳоли орасида мутахассис йўриқномасисиз ўз-ўзини даволаш ҳолатлари кўпайиши эҳтимоли юқори. Аввал бу билан боғлиқ ножўя таъсирлар кузатилган ва яна кузатилиши мумкин.

 

Барча томонларнинг таклифлари эшитилди ва қўмита "Pеклама тўғрисида"ги қонуннинг дорилар рекламаси хусусидаги қисмини қайта кўриш ва янгича таҳририни таклиф қилиш қарорини қабул қилди.

 

Эслатиб ўтамиз, аввалроқ АОКА ва ИИВ Ахборот хизмати ҳамкорликда наркотик моддалари рекламаси жойлаштирилган манзил ҳақида хабар қабул қилувчи @stopnarko_bot Телеграм ботини ишга туширганди. Шунингдек, Ўзбекистонда тотализатор ва букмекерлик фаолиятини реклама қилаётган 10 дан ортиқ сайтга кириш чекланганди.

 

Мафтуна Режаббоева