Энди давлат коррупция ҳақида хабар берганларнинг қариндошларини ҳам ўз ҳимоясига олади
Коррупцияга оид ҳуқуқбузарликлар тўғрисида ахборот бераётган шахсларнинг қариндошлари ҳам давлат ҳимоясида бўлиши белгиланди. Илгари фақат хабар берган шахслар учунгина бу тартиб амал қилар эди.
“Ўзбекистон Республикасининг Коррупцияга қарши курашиш тизимини такомиллаштирилиши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида”ги Қонун Президент томонидан имзоланди.
Унга кўра, Коррупцияга қарши курашиш агентлиги ходимлари коррупциявий ҳуқуқбузарликлар содир этилишини ўрганиш ва таҳлил қилиш учун жазони ижро этиш муассасаларига монеликсиз киришга ҳақли ҳисобланади. Шунингдек, мазкур ташкилотларнинг ҳужжатлари билан танишиш учун ҳам агентликка ваколат берилади.
Бундан ташқари, агентлик ҳар йили Коррупцияга қарши курашиш тўғрисидаги миллий маърузани Олий Мажлисга тақдим этиб бориши белгиланди.
Эслатма. Қонун расмий эълон қилинган кундан эътиборан кучга киради.
Аввалроқ Соғлиқни сақлаш вазирлиги тизимида қарийб 10 миллиардлик маблағ талон–тарож қилингани, энди коррупсионерларга белгиланган жазо енгиллаштирилмаслиги ҳамда коррупционерлар рўйхати тузилгани ҳақида хабар берилганди.
Оламгир Абдиев
