"Оролбўйини экологик инновациялар ва технологиялар ҳудудига айлантирамиз" — Президент Шавкат Мирзиёев
Президент Оролбўйи минтақасидаги тадбиркорларга солиқ ставкаси бўйича имтиёзли фармонни имзолади.
Маълумки, 2021 йил 20 август куни Ўзбекистон Республикаси Президентининг тадбиркорлар билан очиқ мулоқоти ўтказилган.
Учрашув доирасида белгиланган вазифалар ижросини таъминлаш мақсадида бир қатор вазифалар белгиланди.
Унга кўра, Қорақалпоғистон Республикаси ва Хоразм вилоятида тадбиркорлик фаолиятини ташкил этишни ва юқори қўшилган қийматли рақобатбардош маҳсулотлар ишлаб чиқаришни рағбатлантириш орқали ҳудудга инвестицияларни жалб қилиш учун қулай шароитлар яратиш, шунингдек, тадбиркорларнинг муаммо ва таклифларини бевосита ўрганиш ҳамда тадбиркорликни келгусида ривожлантиришнинг асосий йўналишларини белгилаб олинди.
Биринчи ўринда, инвестициялар ва ташқи савдо вазирлиги, Иқтисодий тараққиёт ва камбағалликни қисқартириш вазирлиги, Молия вазирлиги, Савдо-саноат палатаси, Қорақалпоғистон Республикаси Вазирлар Кенгаши ва Хоразм вилояти ҳокимлигининг 2022 йил 1 январдан:
2031 йил 1 январгача Қорақалпоғистон Республикасининг Мўйноқ туманидаги маҳаллий саноат, қишлоқ хўжалиги ва хизматлар соҳаларидаги тадбиркорлик субъектлари учун фойда солиғи, айланмадан олинадиган солиқ, ижтимоий солиқ, жисмоний шахслардан олинадиган даромад солиғи бўйича ўрнатилган солиқ ставкаларини 1 фоиз этиб белгиланди.
Бундан ташқари, мол-мулк солиғи, ер солиғи ва сув ресурсларидан фойдаланганлик учун солиқ ставкалари ҳам ҳисобланган суммадан 1 фоиз миқдорда тўланиши қайд этилди.
Хоразм вилоятининг Тупроққалъа, Янгиариқ, Янгибозор туманларида янги ташкил этиладиган ва шу туманларда рўйхатдан ўтган ҳолда фаолият кўрсатадиган тадбиркорлик субъектлари 2025 йил 1 январгача тадбиркорлик субъектлари (кластерлар бундан мустасно) бўйича фойда солиғи, юридик шахслардан олинадиган ер солиғи, юридик шахсларнинг мол-мулкига солинадиган солиқ ставкаларини 50 фоизга камайтирилди.
Маълум тартибда шакллантириладиган рўйхат бўйича Ўзбекистон Республикасида ишлаб чиқарилмайдиган ўз ишлаб чиқариш (хизмат кўрсатиш) эҳтиёжлари учун олиб кириладиган хомашё, материалларни божхона божидан озод қилиш ва ўша ҳудудларда янги барпо этилаётган боғлар, токзорлар ва тутзорлар эгаллаган ерларга, дарахтларнинг қатор ораларидан қишлоқ хўжалиги экинларини экиш учун фойдаланилишидан қатъи назар, юридик шахслардан олинадиган ер солиғини тўлаш бўйича имтиёзли даврни 5 йил этиб белгилаш тўғрисидаги таклифлар ҳам амалиётга татбиқ этилиши кўзда тутилди.
Ушбу кўрсатмаларнинг ижросини таъминлаш бўйича, Молия вазирлиги 2 ой муддатда мазкур банддан келиб чиқиб, Солиқ кодексига ўзгартириш ва қўшимчалар киритишни назарда тутувчи қонун лойиҳасини Вазирлар Маҳкамасига тақдим этиши режалаштирилди.
Қайд этилишича, Фармоннинг асосий таркибида зарур ташқи муҳандислик-коммуникация тармоқлари билан Давлат бюджети маблағлари ҳисобидан таъминланадиган инвестиция лойиҳалари қиймати камида 50 миллиард сўм миқдорида, яъни 50 миллиард сўмдан 200 миллиард сўмгача бўлган инвестиция лойиҳаларининг харажатлари 20 фоизидан ошмаслиги лозим.
Хоразм вилоятида ижтимоий-иқтисодий ривожланишдан ортда қолаётган ва ишсизлик даражаси юқори бўлган 98 та маҳалла учун 2022-2026 йиллар давомида аҳолини тадбиркорликка ўқитиш ва жалб қилиш лойиҳаларини амалга оширадиган нодавлат нотижорат ташкилотларини қўллаб-қувватлаш учун 50 миллиард сўм миқдорида кредит ресурслари ажратилиши, Ўзбекистон Республикаси республика бюджети ҳисобидан инфратузилмани ривожлантириш учун 150 миллиард сўм маблағ ажратилишини таъминлаш ҳам кўриб чиқилди.
Экспортни рағбатлантириш агентлиги томонидан 2022 йил 1 январдан 2027 йил 1 январгача Оролбўйи минтақасида фаолият юритаётган кичик тадбиркорлик субъектларига корхона қурилиши учун зарур бўлган асбоб-ускуна ва техникаларни республиканинг бошқа ҳудудларидан олиб келиш ҳамда улар томонидан ишлаб чиқарилган юқори қўшилган қийматга эга маҳсулотларни республиканинг бошқа ҳудудларига етказиб бериш билан боғлиқ темир йўл транспортида ташиш харажатларининг 50 фоиз қисмини қоплаб бериш белгиланди.
Мазкур Фармонда шунга оид бир қанча бандлар мавжуд бўлиб, асосий мақсад Оролбўйи минтақасидаги ривожланишдан ортда қолаётган ҳудудларда тадбирклрликни ривожлантиришга қаратилган.
Ушбу Фармон ижросини ҳар чоракда муҳокама қилиб бориш, ижро учун масъул идоралар фаолиятини мувофиқлаштириш ва назорат қилиш Бош вазирнинг ўринбосарлари С.У. Умурзаков ва Ж.А. Қўчқоров зиммасига юклатилди.
Эслатиб ўтамиз, аввалроқ Шавкат Мирзиёев Ўзбекистоннинг эртанги куни – тадбиркорлар эканлиги ҳамда тадбиркорларга 11,5 миллиард сўмлик "снос" пуллари тўлаб берилиши ҳақида хабар берилганди.
Чўлпоной Аҳмедова тайёрлади.
