Танзила Норбоева Миришкор ҳокими қарорини бекор қилди
Сенат қарорининг ижроси таъминланмай қолаётгани айтилмоқда.
Олий Мажлиси Сенатининг ўн учинчи ялпи мажлисида халқ депутатлари маҳаллий Кенгашларининг айрим қарорларини бекор қилиш тўғрисидаги масала кўриб чиқилганди.
Мазкур мажлисда Халқ депутатлари Миришкор тумани кенгашининг 2020 йил 19 ноябрдаги “Миришкор туманидаги айрим фермер хўжаликлари томонидан ажратилган ер майдонларидан самарали ва мақсадли фойдаланиш аҳволи, 2020 йилда давлатга пахта сотиш бўйича тузилган контракция шартномаларининг бажарилишини таъминлаш чора- тадбирлари тўғрисида”ги 67/16-6 сонли қарори қонунчиликка зид деб топилиб, бекор қилиниши белгиланди.
Бу борада Ўзбекистон Республикаси Олий Мажлиси Сенати раиси имзоси билан қарор ҳам қабул қилинган.
Аниқланишича, Миришкор тумани Дўстлик маҳалласида фаолият олиб бораётган бир гуруҳ фермерларга ажратилган ер майдонлари 2020 йил ноябрь ойида фермерларнинг розилигисиз, Халқ депутатлари Миришкор тумани кенгаши депутатлари иштирокида муҳокамага қўйилиб, қайтариб олинган. Сенат депутатлар ва ҳокимнинг бу хатти-ҳаракатини қонунга зид деб топсада, ҳалигача фермерлардан олиб қўйилган ер майдонлари қайтариб берилмаяпти.
Ҳудудда фаолият олиб бораётган фермерларнинг айтишича, уларга 49 йилга ижарага берилган ерларда ҳозирда кластер фаолият кўрсатмоқда.
Фермерлардан бири Ғолиб Махатов туман ҳокимининг қишлоқ хўжалиги масалалари бўйича ўринбосари Жаҳонгир Абдиназаровга ҳам мурожаат қилганини, аммо антиқа жавоб олганини қўшимча қилди:
“Бу ўринбосарга, Сенат раисининг қарори борку, нега ерларимиз қайтарилмаяпти деб юзланганимзда, “Танзила Норбоева қарор чиқарган бўлса, келиб масалани ўзи ҳал қилиб берсин” деб айтди.
Маълумот учун: тез орада Халқ депутатлари Миришкор тумани кенгашининг қонунга зид чиқарилган қароридан азият чекаётган фермерлар ҳақида видеолавҳа ҳам намойиш этилади.
Эслатиб ўтамиз, аввалроқ Қашқадарёда депутатларнинг рухсатисиз 10 миллиард сўмга яқин маблағ ишлатиб юборилгани маълум бўлгани ҳамда илмий фаолият билан шуғулланувчи аёллар асосан Тошкент шаҳрида йиғилгани ҳақида хабар берилганди.
Чўлпоной Аҳмедова
