Тарбиячи тарбиялими?
Сўнгги вақтларда замонавий “боғча oпалар”нинг тарбияланувчи болажонларни қўрқитиб, “трендга” чиқаётган гап-сўзлари анчагина болалаб қолди.
Аслида, аксарият мактабгача таълим тизимида ишлаётган ходимларнинг ўзлари қай даражада тарбияли деган савол туғилади.
Ижтимоий тармоқлар, Youtube каналларида айланиб қоладиган шармандали ҳолатларга бир неча бор гувоҳ бўлганмиз.
Яқинда ҳам байрам арафасида худди шундай ҳолатга ўхшаш “свежи” видеохабарлар интернетни “портлатди”.
Ушбу видеода тарбиячи аёл болаларга қўпол муомала қилаётганини кўриш мумкин. Воқеа Наманган вилояти Чуст тумани "Хисорак" МФЙ 43-сонли "Ғунчаой" боғчасида содир бўлгани айтилган.
Бахтга қарши бундай жараёнларнинг кети узилмаяпти. Ёки қонунда белгиланган тарзда чора кўрилмагани сабаб, “боғча oпалар”нинг бурни “осмонда”.
Бундан ташқари, болалар ҳақини ўғирлаётган, уларни виждонсизларча ўз фарзандига едираётган боғча мудиралари ва ходимлари ҳам талайгина.
Яқин тарихга назар солсак, “Сурхондарёда боғча боласига бақирган боғча опа ишдан бўшатилди” номи остида тарқалган хабарларга кўра, болаларни деворга тик турғазиб, уларни “самосуд” қилган тарбиячининг важоҳати нафақат ёш бола, балки катта одамларни ҳам даҳшатга солади!
Аёл – Она! Назокат тимсоли! Шундай нозик хилқат жажжи болажонларининг беғубор болалик хотираларини пучга чиқариб, нафақат таълим, тарбия ҳам беришга масъул бўла туриб, бундай жоҳиллик сари боришига нима мажбур қилиши мумкин!?
Муҳими, инсоний фазилатларимизга дарз кетмаса бўлгани.
Чўлпоной Аҳмедова
