Ҳунармандларга имтиёзли кредитлар берилади
Имтиёзли кредитлар ҳунарманднинг талаби бўйича нақд пул олиш имконияти билан тақдим этилади.
Қарорга кўра, 2022 йилда оилавий тадбиркорликни ривожлантириш дастурлари доирасида ажратилаётган маблағларнинг 500 миллиард сўми ҳунармандчилик лойиҳаларини молиялаштиришга йўналтирилади.
Бундан ташқари, имтиёзли кредитлар ҳунармандчилик лойиҳаларини амалга ошириш учун 6 ойгача имтиёзли давр билан оилавий тадбиркорликни ривожлантириш дастурлари доирасида кўзда тутилган шартлар асосида ажратилади. Чекланган сумма 225 миллион сўмгача.
Шунингдек, имтиёзли кредит ажратиш бўйича “oilakredit.uz” электрон платформасида ҳунармандларни онлайн навбатга қўйиш ва уларнинг лойиҳаларини кредитлаш учун алоҳида бўлим ишга туширилади.
Жорий йилдан бошлаб “уста-шогирд” анъаналари асосида ҳунар ўргатаётган ҳунармандларга шогирдлар тайёрлаши, зарур хомашё сотиб олиши ва шогирдларни иш ҳақи билан таъминлаши учун 6 ой давомида ҳар ойда БХМнинг 2 бараваридан кам бўлмаган миқдорда субсидия берилади.
Шу билан бирга, мустақил фаолиятини бошлаш учун асбоб-ускуна ва жиҳозларни сотиб олишда шогирдларга кетадиган ҳаракатларнинг 50 фоизи миқдорида субсидия тўланади.
Шунча миқдордаги субсидиялар уста ҳунармандлар учун ҳам берилади. Бундан мақсад интернет сайтларини ташкил этиш, ўз маҳсулотларини жаҳон электрон савдо майдончаларига чиқариш ва реклама харажатларининг тенг ярмини қоплашдир.
Эслатма. Бунда харажатлар БҲМнинг 25 баробаридан зиёд бўлмаслиги зарур.
Субсидия ажратиладиган ҳунармандлар ва шогирдлар ҳисоби “Ҳунарманд” уюшмаси томонидан юритилиб, Маҳаллабай ишлаш ва тадбиркорликни ривожлантириш агентлигининг “Онлайн маҳалла” электрон платформаси билан интеграция қилинади.
Маълумот учун, 2022 йилдан “Ҳунарманд” уюшмаси аъзолари ҳам коммунал инфратузилма хизматларига аҳолига белгиланган тарифлар ва шартлар асосида ҳақ тўлайди. Мазкур тартиб фаолият юритиш жойидан қатъий назар амалиётга татбиқ қилинади.
Аввалроқ Бандлик ва меҳнат муносабатлари вазирлиги ажратаётган субсидия кимларга берилиши ҳамда Маҳаллабай ишлаш ва тадбиркорликни ривожлантириш марказлари ташкил этилиши ҳақида хабар берилганди.
Оламгир Абдиев
