"Дельтакрон" лабораториядаги хатолик туфайли вужудга келган бўлиши мумкин — ЖССТ эксперти
Шунингдек, у касалликдан ҳимояланиш учун бир қанча маслаҳатлар берган.
ЖССТ эксперти Мария Ван Керкхове Кипрда аниқланган “дельтакрон” штамми лабораториядаги хатолик туфайли пайдо бўлганини тахмин қилди. Бу ҳақда у шахсий Twitter саҳифасида маълум қилган.
“ ‘Дельтакрон’ штамми катта эҳтимоли билан лабораториядаги жараёнларнинг ифлосланиши оқибатида шаклланган бўлиши мумкин”, – деган у.
Керкхофе, шунингдек, турли вирусларнинг бир вақтдаги циркуляциясини номлашда “дельтакрон”, “флурона” каби атамаларни қўлламасликни сўраган. Унинг фикрича, “бу вирус ёки штаммларнинг бирлашишини англатади, бу жараён эса кузатилмаяпти”. Эксперт коронавирус ва гриппга қарши эмланишни, ижтимоий масофа сақлашни, ниқоб тақиш ва доимий равишда хоналарни шамоллатиб туришни маслаҳат берган.
Аввалроқ “Оmicron” болалар учун кўпроқ хавф туғдириши мумкинлиги тўғрисида хабар берилганди.
Жаҳонгир Қўзиев
