Қарши давлат университетидаги қоидабузарларга чора кўрилди
Бу бўйича жиноий иш университетдаги кўплаб дарахтларнинг кесилгани юзасидан очилган.
Қашқадарё вилояти Қарши давлат университетида 38 туп дарахт ноқонуний кесиб ташлангани ҳақида хабар берилганди. Бош прокуратура ҳолат юзасидан қўшимча маълумот берди.
Унга кўра, университетнинг 6 нафар масъул ходимига нисбатан Маъмурий жавобгарлик тўғрисидаги кодекснинг 79-моддаси (Дарахтларни, буталарни, бошқа ўсимликларни ва ниҳолларни қонунга хилоф равишда кесиш, кундаков қилиш, шикастлантириш, йўқ қилиш ёки бошқа жойга кўчириб ўтказиш) 1-қисми билан маъмурий жавобгарликка оид иш қўзғатилган.
Аниқланишича, ушбу ҳолатда табиатга 285 миллион сўм миқдорида зарар етказилган.
Маълумот учун: 13–15 январь кунлари Экология қўмитасининг давлат инспекторлари томонидан дарахт кесиб ташланган жойда ўрганиш ишлари олиб борилган. Университет томонидан Ягона давлат интерактив хизматлари портали орқали давлат ўрмон фондига кирмайдиган дарахтларни кесиш учун уч маротаба мурожаат қилинган ва бу тўғрисида рад жавобини олган.
Қайд этилишича, Экология ва атроф-муҳитни муҳофаза қилиш бошқармаси томонидан рад жавоби берилганига қарамасдан, жами 38 туп дарахт ноқонуний кесилган. Ҳуқуқбузарликка алоқадор шахслардан тушунтириш хатлари олинди.
Мазкур қонунбузарлик ҳолати бўйича ўсимлик дунёсига етказилган зарар 267 миллион 543 минг сўм миқдорида ҳисобланди. Ҳодисага оид материаллар ҳуқуқни муҳофаза қилиш органларига тақдим этилган.
