Дунёда тўртинчи одам ОИВ инфекциясидан тузалди
Беморга илдиз ҳужайра кўчириб ўтказилган ва чақалоқ киндик қони қуйилган.
Дунёда тўртинчи одам ОИВ инфекциясидан бутунлай тузалди. "The Wall Street Journal"нинг хабар беришича, Нью-Йорк олимлари буни илдиз ҳужайраларини кўчириб ўтказиш ва киндик қонини қуйиш йўли билан уддалади.
Хабар қилинишича, бемор ўрта ёшлардаги аёл бўлган. ОИВ инфекцияси аниқланганидан 4 йил ўтиб, унда лейкемия ташҳиси ҳам қўйилган. У 2020 йилдан бери антиретровирус терапиясини тўхтатган ва ҳеч қандай инфекция аломатлари ўзини кўрсатмаяпти.
Илдиз ҳужайра аёлнинг яқин қариндошларидан биридан кам учрайдиган мутация билан кўчириб ўтказилган. Киндик қони эса чақалоқдан олинган.
2020 йилда олимлар 36 ёшли бразилияликнинг ОИВ инфекциясидан тузалганини эълон қилган эди. У вирусдан бутунлай тузалган учинчи одам бўлган.
Аввалроқ ОИВ ва Гепатит С ташхиси учун мобил лаборатория ишга туширилгани ҳақида хабар берилганди.
Шарофат Маҳмудова
