"Божхона бошқа давлат идораларига намуна бўлиши керак" — Президент
Коррупцияга қарши курашишда энг муҳим масала — божхона ходимларининг ҳалол ишлашини таъминлаш.
Бироз аввал Президент Шавкат Мирзиёев ҳузурида 2022 йилда божхона маъмурчилигини янада такомиллаштириш ва соҳани коррупциядан холи тизимга айлантириш бўйича устувор вазифалар юзасидан йиғилиш бошланганди.
Унда давлат раҳбари тизимдаги рақамларга эътибор қаратди:
"Сўнгги беш йилда мамлакатимизнинг ташқи савдо айланмаси 2 баробарга - 2016 йилдаги 24 миллиард доллардан 2021 йилда 42 миллиард долларга ошди.
Божхона тизими мамлакатимизни жаҳон иқтисодиётига боғлайдиган кўприк ҳисобланади.
Бу тизим тўғри ва очиқ-ошкора ишламаса, тадбиркорлик, инвестицияга тўсиқ бўлади ҳамда аҳолининг норозилигини келтириб чиқаради.
Шунинг учун бу соҳада 2019 йилда катта ислоҳотларни бошладик", — деди Президент йиғилиш аввалида.
Жумладан:
— божхона постларида “яшил йўлак”лар жорий этилиб, ҳозирда улар орқали 95 фоиз йўловчи ва 75 фоиз юк ўтмоқда;
— аввал 12 та идорадан олинган 60 турдаги рухсатномалар “ягона дарча” орқали электрон шаклга ўтказилди;
— натижада божхонада юкларни расмийлаштириш вақти 10 баробаргача қисқарди.
Бундан ташқари, божхона ходимларига тегишли тартибда имтиёзлар ҳам берилади.
Хусусан:
— бир ой муддатда битта постда 3 йил ишлаган ходимлар ротация қилинади;
— 1 мартдан барча божхона ходимлари фақат очиқ танлов асосида ишга қабул қилинади;
— божхона тизимида ходимлар даромади ва мол-мулкини декларация қилиш жорий этилади;
— божхона ходимларининг фаолияти самарасига қараб, иш ҳақига 50 фоизгача қўшимча устама тўланади. Бу устамалар аниқ кўрсаткичлар (KPI) асосида белгиланади;
— олис ва шароити оғир постларда ишлаётган ходимлар иш ҳақига қўшимча устамалар жорий этилади;
— божхона ходимларига махсус унвон учун устамалар миқдори оширилади.
