Абдулазиз Камилов Венгрия Ташқи ишлар вазири Петер Сияртони табриклади
Маълум қилинишича, 3-март куни Ўзбекистон билан Венгрия ўртасида дипломатик алоқалар ўрнатилганига 30 йил тўлган.
Бугун, 3 март куни Ўзбекистон Республикаси Ташқи ишлар вазири Абдулазиз Камилов ва Венгрия Ташқи иқтисодий алоқалар ва ташқи ишлар вазири Петер Сиярто икки мамлакат ўртасида дипломатик муносабатлар ўрнатилганининг 30 йиллиги муносабати билан бир-бирларини табриклади.
Ўзбекистон Ташқи ишлар вазирининг мактубида сўнгги йиллар икки давлат муносабатларининг барча соҳаларда ва турли даражаларда жадал юксалиш даврига айлангани қайд этилган.
Шунингдек, Венгрия билан сиёсий, парламент, иқтисодий ва таълим соҳаларида очиқ ва конструктив мулоқотни давом эттиришдан манфаатдор экани маълум қилинган.
Ўз навбатида, Петер Сиярто ҳам Ўзбекистон Венгриянинг стратегик шериги эканини мамнуният билан таъкидлаб ўтган.
“Биз умумий маданий-тарихий мерос ҳамда ўзаро ҳурмат, ишонч ва дўстлик каби қадриятларга асосланган икки томонлама алоқаларни янада мустаҳкамлашни мақсад қилганмиз”, – дейилган Венгрия ташқи сиёсат идораси раҳбарининг мактубида.
Вазирлар икки давлат ўртасидаги ҳамкорлик Ўзбекистон ва Венгрия халқлари манфаатлари йўлида бундан буён ҳам ҳар томонлама ривожланиб боришига ишонч билдиришган.
