АҚШ вакиллар палатаси Украинага 14 миллиард долларлик ёрдам пакетини тасдиқлади
Бу ҳақда BBC хабар берди.
Ушбу маблағнинг қарийб 6.5 миллиарди ҳарбий ёрдам сифатида берилади. Қолгани эса турли гуманитар ва иқтисодий муассасалар ўртасида тақсимланади. Ҳозирча ушбу лойиҳа сенатда тасдиқланмаган бўлса-да, катта эҳтимол билан у маъқулланади.
"Жасур ва эрксевар Украина халқи ҳамда бизнинг минтақадаги иттифоқчиларимиз Владимир Путинга ва ноқонуний Россия босқинига қарши кураш учун зарур инвестицияларни қўлга киритади", — деган Вакиллар палатаси спикери Нэнси Пелоси.
Маълумот ўрнида: Россия 24 февраль куни Украинада ҳарбий операция бошлади. Шундан кейин Ғарб давлатлари унга қарши санкциялар жорий этди. Бир вақтнинг ўзида Украинага ҳарбий ёрдам бериш кўпайди. Шу кунга қадар Киевга Европа ва АҚШ томонидан минглаб танкка қарши ракеталар, кўчма зенит тизимлари ва ўточар қуроллар етказиб берилди.
Эслатиб ўтамиз, аввалроқ Вашингтон Украина қочқинларини қабул қилган давлатларга катта ёрдам ажратишини маълум қилганди.
