Оғир ва секин: Путиннинг ёрдамчиси Украина билан музокаралар ҳақида маълумот берди
Унинг сўзларига кўра, Украина Австрия ёки Швеция каби нейтрал давлатга айланмоқчи.
Киев билан оғир музокаралар олиб борилмоқда. Бу ҳақда РФ президенти ёрдамчиси Владимир Мединский маълум қилди.
Мединский Украина билан музокараларда Россия делегациясига бошчилик қилмоқда. “Музокаралар оғир ва секин кетмоқда. Албатта, биз бунинг барчасини тез бўлишини истаймиз... биз тез орада тинчликка эришишни истаймиз”, – деган у.
Мединский музокаралардаги асосий вазифа мураккаб масалалар ичида тезда келишувга келиш имконини берувчи нуқтани топиш эканини таъкидлаган.
Шунингдек, у Украинанинг позициясини очиқлаган. Мединскийнинг сўзларига кўра, Киев Австрия ва Швеция каби нейтрал давлатга айланишни истамоқда. Бу ўз армияси ва флотига эга, аммо ҳарбий-сиёсий блокларга қўшилмайдиган давлат бўлишни англатади. Ушбу масалалар икки давлат мудофаа вазирликлари томонидан муҳокама қилинаётгани очиқланган.
Эслатиб ўтамиз, аввалроқ Япония Россия ва Беларусга янги санкциялар жорий этгани тўғрисида хабар берилганди.
