Март ойидаги ёғингарчиликда бодомнинг 15-18 фоиз ҳосили йўқолган – вазирлик
Совуқ уриши оқибатида қишлоқ хўжалик маҳсулотларига етказилган зарар миқдори очиқланди.
Қишлоқ хўжалиги вазирлиги март ойидаги кўп ёғин ва совуқ уриш ҳодисаларининг мевали дарахтлар ва қишлоқ хўжалиги маҳсулотларига келтирган зарарини маълум қилди.
Унга кўра, Фарғона водий вилоятларида ўрик ва бодомнинг эрта пишар навлари 10 фоиздан 23 фоизгача, гилоснинг эртапишар нави Наманганда 2,4 фоизгача зарарланган.
Жанубий вилоятлар, хусусан, Қашқадарё вилоятида эртапишар гилос ва шафтолининг 9 фоизи, олхўри ва бодомнинг 15-18 фоиз ҳосили йўқолган.
Марказий ҳудудларда ўрик 7 фоиз (Бухоро) дан 19 фоиз (Навоий)гача, гилос, олхўри ва шафтоли меваларида 3-8 фоиз зарарланиш ҳолатлари кузатилгани аниқланган.
Вазирликка кўра, совуқ ҳаво тўлқинлари шимол ҳудудларда мевали дарахтларга зарар келтирмаган. Шу билан бирга, совуқ ва намгарчил оқимлар қишлоқ хўжалик йўналишида узум ҳамда картошка каби сабзавот турларига зарар келтирмаган.
Бу йилги намгарчил ҳаводан асосан ўрик зарарланган. Зарарланиш 20 фоизгача. Ўтган йили ўрик дарахти ҳосили аномал совуқлардан марказий ва жанубий вилоятларда 80 фоизгача йўқотилган эди.
