Ўзбекистон-Қирғизистон тараққиёт фонди очилди
Унинг устав капитали 50 миллион долларни ташкил этади.
Бишкекда Ўзбекистон-Қирғизистон тараққиёт фонди фаолиятига старт берилди. Бу ҳақда “Дунё” ахборот агентлиги хабар берди.
Очилиш маросимида Ўзбекистон Республикаси Бош вазири ўринбосари – инвестициялар ва ташқи савдо вазири Сардор Умрзоқов ҳамда Қирғизистон ҳукумати раҳбари Акилбек Жапаров қатнашган.
Жапаров ушбу тадбир икки томонлама муносабатлар ривожининг яққол намунаси эканини таъкидлаган.
“Ўзбекистон Қирғизистоннинг асосий савдо-иқтисодий ҳамкорларидан бири. Аммо имкониятлардан ҳали тўла фойдаланилмаган”, – деган у.
Тараққиёт фонди Ўзбекистон ва Қирғизистон иқтисодий ҳамкорлигини чуқурлаштириш мақсадида тузилган. Унинг штаб-квартираси Бишкекда жойлашган. У қуйидаги тармоқларни молиялаштиради:
- Агросаноат комплекси;
- Текстиль саноати;
- Тоғ-кон ва металлургия;
- Транспорт;
- Қайта ишлаш саноати;
- Қурилиш;
- Савдо;
- Тадбиркорликни ривожлантириш;
- Энергетика;
- Инфратузилмани ривожлантириш;
- Туризм.
Фонднинг устав капитали 50 миллион АҚШ долларини ташкил этади.
