Украинадан қайтган талабаларга ўқишини кўчиришга рухсат берилди
Кўчириш соддалашган тартибда амалга оширилади.
Олий ва ўрта махсус таълим вазирлиги маълумотига кўра, Ўзбекистон Республикаси таълим муассасаларига ўқишга қабул қилиш бўйича Давлат комиссияси томонидан Украинадан қайтиб, республика олий таълим муассасаларига ўқишини кўчириш истагини билдирган фуқароларнинг аризаларига мувофиқ уларнинг ўқишини соддалаштирилган тартибда кўчиришга рухсат берилди.
Ўқишни Ўзбекистонда давом эттириш истаги билан ариза топширган талабалар жорий йил 26 апрелдан ўқишни кўчирмоқчи бўлган олий таълим муассасасига мурожаат қилишлари сўралади.
Бунда, ўқишини кўчиришга рухсат берилган фуқароларнинг ҳужжатларини расмийлаштиришда аввалги йилларда таҳсил олиб, сўнгги йилларда талабалар сафидан четлатилган ёки академик таътилда бўлган фуқароларнинг ўқишини кўчиришга рад жавоби берилади.
