Эрдўған 5 йил ичида илк бор Саудияга келди
У икки давлат муносабатларининг янги босқичи бошланаётганини айтган.
Туркия президенти Ражаб Тоййиб Эрдўғанни пайшанба куни Саудия Арабистонига расмий ташрифини бошлади. Бу унинг ушбу мамлакатга 2017 йилдан кейин илк келиши ҳисобланади.
Туркия етакчиси ва унинг рафиқасини Жидда аэропортида Макка амири Холид ал-Файсал кутиб олган. Қатор экспертлар Эрдўғаннинг сўнгги ойларда араб давлатлари билан мавжуд муаммоларни олиб ташлаганини ва улар билан, энг аввало БАА ва Саудия Арабистони билан яқинлашишни бошлаганини қайд этган.
Эрдўғаннинг ўзи бу ташрифни Анқара ва Ар-Риёд муносабатларининг янги босқичи бошланиши сифатида баҳолаган.
"Ибиз минтақада тинчлик ўрнатилиши ва низолар якунланиши учун ҳаракат қиляпмиз. Ўзаро муносабатларнинг янги даврини бошлашга ҳаракат қиламиз. Бу сиёсий, ҳарбий ва маданий алоқаларни кучайтиришни назарда тутади. Иқтисодиётларимиздаги ўзаро бир-бирини тўлдирувчи нуқталар Саудиялик инвесторларни Туркияга жалб қилаётган омиллардан бири ҳисобланади", — деган у.
Ҳозирда Эрдўған Саудия Арабистони валиаҳд шаҳзодаси Муҳаммад бин Салмон билан учрашган. Улар ўртасидаги музокаралар Ал-Салом саройида, ОАВ учун ёпиқ форматда ўтган.
Аввалроқ Ироқ Туркиянинг мамлакат ҳудудидаги ҳарбий операциясидан норозилик билдирганди.
