Ўзбекистондаги хусусий тиббиёт муассасалари сони 7 минг 300 дан ошди
Мазкур тармоқдаги энг кўп шифохона Тошкент шаҳри, Андижон ва Тошкент вилоятларида жойлашган
Мамлакатдаги хусусий тиббиёт муассасалари сони 7 минг 320 тага етди. Бу ҳақда Соғлиқни сақлаш вазирлиги матбуот хизмати хабар берди.
Вазирлик хабарида ушбу муассасаларнинг 50 таси хорижий мамлакатлар билан ҳамкорликда очилгани қайд этилган.
Ҳозирда мазкур тармоқда фаолият юритган шифокорлар сони 16 минг 300 нафардан, ўрта тиббиёт ходимлари сони эса 24 минг 840 нафардан зиёдни ташкил этиб, хусусий шифохоналарнинг 5 минг 823 таси амбулатор, 1 минг 497 таси эса стационар шароитида иш олиб бормоқда. Энг кўп хусусий тиббиёт муассасалари Тошкент шаҳри (1 минг 628 та), Андижон (726 та) ва Тошкент вилоятларида (644 та) жойлашган.
Таъкидланишича, стационар шаклда фаолият олиб бораётган хусусий шифохоналарда санаторийлар билан қўшиб ҳисоблаганда 42 мингдан ортиқ койка мавжуд. Энг кўп ўрин-жойлар қуйидаги ҳудудлар кесимига тўғри келган:
Андижон вилояти — 6 минг 348 та;
Наманган вилояти — 5 минг 880 та;
Қашқадарё вилояти — 4 минг 602 та.
