Тошкентда даҳшатли автоҳалокат юз берди
Спарк ҳайдовчиси тезликни ошириб, бетон тўсиққа урилиши оқибатида 2 киши ҳалок бўлган.
Бугун, 12 май куни Тошкент шаҳрида Спарк русумли автомобиль иштирокида йўл-транспорт ҳодисаси содир бўлди. Бу ҳақда шаҳар ИИБ ахборот хизмати хабар берди.
Қайд этилишича, тунги соат 03.00 ларда Чилонзор тумани Бунёдкор шоҳкўчасида 1999 йилда туғилган У.М. “Спарк” русумли автомобилни ишончнома асосида бошқариб, тезликни ошириши оқибатида рул бошқарувини йўқотган ва йўлни ажратиб турувчи қисмидаги бетон устунга урилган.
ЙТҲ оқибатида автомобиль ҳайдовчиси олган тан жароҳатлари билан воқеа жойида вафот этган. Автомобилда бўлган йўловчи К.Ш. шифохонага олиб борилган, бироқ шифокорларнинг саъй-ҳаракатларига қарамасдан вафот этган.
Ҳозирда мазкур ҳолат юзасидан Тошкент шаҳар ИИББ Тергов бошқармаси томонидан Ўзбекистон Республикаси Жиноят кодексининг 266-моддаси 3-қисми билан жиноят иши қўзғатилган.
